इन्सेक गतिविधिहरू

नेपाल मानव अधिकार वर्ष पुस्तक २०२० मा समेटिने घटनाका विषयमा वार्षिक समीक्षा सम्पन्न भएको छ ।

अनौपचारिक क्षेत्र सेवा केन्द्र(इन्सेक) सोलुखुम्बुको आयोजनामा पुस १५ गते सल्लेरीमा समीक्षा सम्पन्न भएको हो ।

समीक्षा कार्यक्रममा इन्सेक अभिलेखका आधारमा २१ वटा मानव अधिकारका घटनामा २९ जना पीडित भएको तथ्याङ्क सार्वजनिक गरिएको छ ।

समीक्षा कार्यक्रममा सोलुखुम्बुका प्रमुख जिल्ला अधिकारी बेदनिधि खनालले जिल्लामा बालसुधार गृह र मानसिक स्वास्थ्य परीक्षणको व्यवस्था नहुँदा समस्या भएको बताउनुभयो । उहाँले इन्सेकले हालसम्म गरेको कार्यको प्रशंसा गर्दै विभिन्न कार्यालयमा दर्ता भएका घटनामा मात्रै केन्द्रित नहुन सुझाव दिनुभयो । उहाँले संविधानमा व्यवस्था भएपनि त्यस विरूद्ध हुने जस्तोसुकै विषयवस्तुलाई पुस्तकमा समेट्न इन्सेकलाई सझुाव दिनुभयो ।

जिल्ला प्रहरी कार्यालयमा डिएसपी नारायणप्रसाद चिमोरियाले राज्य विरूद्ध काम गर्ने जोकोहीलाई गिरफ्तार गरी कानूनी दायरामा ल्याउने काम प्रहरीको भएपनि मानव अधिकारका सवालमा प्रहरी सधैँ सचेत भएको बताउनुभयो । डिएसपी चिमोरियाले जिल्लामा भएका अधिकांश घटनाको अनुसन्धानमा प्रहरी सफल भएको बताउनुभयो ।

नेपाली काङ्ग्रेस सोलुखुम्बुका सभापति विनोद बस्नेतले विभिन्न सरकारी निकायमा भएका सेवा प्रवाह तथा योजना बाँडफाँटको क्षेत्रमा इन्सेकको शसक्त भूमिका हुनुपर्नेमा जोड दिनुभयो । उहाँले सरकारी कर्मचारी तथा सरकारी अड्डामा समेत मानव अधिकार हनन् हुने गरेको बताउँदै त्यस्ता विषयमा इन्सेकलाई खबरदारी गर्न सुझाव दिनुभयो ।

नगर प्रवक्ता शारदा माया तामाङले इन्सेकले वार्षिक रूपमा प्रकाशन गर्ने पुस्तकले नेपालको मावन अधिकारको अवस्था चित्रण गरेको बताउनुभयो । राष्ट्रिय मानव अधिकार सङ्गठन सोलुखुम्बुका उपसभापति हिमाल गिरीले स्थानीय सरकारमा व्यथिति बढेकाले सबैको ध्यान त्यसतर्फ जानुपर्नेमा जोड दिनुभयो । कतिपय घटनाहरू आर्थिक कारोबारमा मिल्ने तथा अधिकार क्षेत्र भन्दा बाहिरका घटना समेत लुकाउने गरेको भन्दै यस प्रति सबैको ध्यान नपुगे समस्या जटिल बन्दै जाने उहाँले बताउनुभयो ।

 भोजराज कार्की