इन्सेक गतिविधिहरू

अनौपचारिक क्षेत्र सेवा केन्द्र (इन्सेक) म्याग्दीको आयोजनामा मानव अधिकार वर्षपुस्तक-२०१९ का लागि सङ्कलित घटनाहरूको अर्धवार्षिक पूर्व समीक्षा कार्यक्रम असार ८ गते बेनीमा सम्पन्न गरिएको छ ।

कार्यक्रममा सहायक प्रमुख जिल्ला अधिकारी शोभाखर पोखरेलले आम नागरिकलाई कानुनी सेवा कसरी लिने भन्ने जानकारी कम भएकाले त्यसतर्फ इन्सेक लगायतका सङ्घसंस्थाहरूले पहल गर्नुपर्ने बताए ।

नागरिकहरूमा आफूले लिन मिल्ने सुविधा के हुन र कानुनमा कस्ता छन् ? भन्ने विषयमा ज्ञान नभएको कारणले गर्दा राज्यको निकायबाट सुविधा लिनबाट वञ्चित हुनु परेको पोखरेलको भनाई छ ।

पोखरेलले अन्यायमा परेका नागरिकहरूले कुनै पनि हालतमा न्याय पाउनु पर्ने र त्यसका लागि आम नागरिक, इन्सेक, मानव अधिकार तथा शान्ति समाजलगायतका मानव अधिकारसंम्बन्धी संस्थाहरूले पहल थाल्नु पर्ने बताएका थिए ।

जिल्ला प्रहरी कार्यालय, म्याग्दीका सई चेतनाथ चापाईले प्रहरीमा पछिल्लो समय बहुविवाहका घटना आउने गरेको तर मिलापत्र गरिदिनु भन्ने तवरले प्रहरीको महिला तथा बालबालिका सेवा केन्द्रमा सम्पर्क हुने गरेको बताए ।

प्रकाशन पूर्व समीक्षा कार्यक्रममा इन्सेक म्याग्दी जिल्ला प्रतिनिधि अमृत बास्कुनेले म्याग्दी जिल्लामा सन २०१८ को पहिलो ६ महिनामा अभिलेख गरिएका १७ वटा घटनाहरू सरोकारवाला माझ राखेका थिए । जसमध्ये घरेलु हिंसासम्बधी १६, बलात्कारसम्बन्धी तीन, बहुविवाहसम्बन्धी तीन र नागरिक तथा राजनीतिक अधिकारसम्बन्धी एउटा रहेका छन् ।

अमृत बास्कुने