नेपाल मानव अधिकार वर्षपुस्तक-२०१८ प्रकाशन पूर्व समीक्षा सम्पन्न

जिल्लामा मानव अधिकार हनन्का घटनाहरूलाई न्यूनीकरण गर्न तथा भएका घटनाहरूलाई कानुनी दायरामा ल्याउन जिल्लामा मानव अधिकारको क्षेत्रमा काम गर्ने संस्थाका प्रतिनिधिहरूको सञ्जाल बनाउनु पर्ने सरोकारवालाहरूले बताएका छन् ।

पुस १३ गते विदुरमा इन्सेकको आयोजनामा नेपाल मानव अधिकार वर्षपुस्तक-२०१८ का लागि सङ्कलित घटनाहरूको प्रकाशन पूर्व समीक्षा कार्यक्रममा सहभागी वक्ताहरूले जिल्लाका गाउँगाउमा भएका मानव अधिकार हनन्का घटनाहरूलाई समेट्नको लागि फराकिलो सञ्जाल आवश्यक रहेको बताएका हुन् ।

Photo20171228Nuwakot

नेपाल वार एसोसियशन नुवाकोटका अध्यक्ष देवराज कँडेलले मानव अधिकारको क्षेत्रमा सरोकार राख्ने संस्थाहरूको एक फराकिलो सञ्जाल निर्माण गरी मानव अधिकार हनन्का घटनाहरूको खोजी गर्ने, हनन्का घटना हुन नदिनको लागि अभियान चलाउन सकिने बताए ।

कार्यक्रममा नेपाली काङ्ग्रेसकी बिन्दा अर्यालले मानव अधिकार हनन्का घटनामा संलग्नहरूलाई कानुनी दायरामा ल्याउन र पीडितलाई न्याय दिलाउनको लागि पैरवी गर्न पनि मानव अधिकारकर्मीहरू सक्रिय हुने बताइन् ।

कार्यक्रममा नुवाकोट जिल्ला अदालतका श्रेस्तेदार महिमानसिंह विष्टले अदालतले मानव अधिकारको संरक्षणको लागि खेल्नु पर्ने भूमिकामा सचेत रहेको बताए । उनले मुद्दाको प्रकृति अनुसार महिला, बालबालिकाका मुद्धाहरूलाई प्रक्रियामा प्राथमिकता दिएको बताए ।

कार्यक्रममा एकीकृत राप्रपा राष्ट्रवादीका रामकृष्ण भट्टले प्रहरी र अदातलमा आएका घटनाहरूलाई मात्र खोजी नगरी कानुनको क्षेत्रमा नआएका घटनाहरूको पनि खोजी गर्नु पर्ने बताए ।

कार्यक्रममा नेपाल पत्रकार महासङ्घ नुवाकोटका अध्यक्ष कपिलदेव खनालले मानव अधिकारको संरक्षणको लागि सक्रिय संस्थाहरूले हनन्का घटनाहरूलाई बाहिर ल्याउन सक्रिय हुनु पर्ने बताए ।

उनले मानव अधिकारका हनन्का घटनाहरूलाई वर्षपुस्तकमा सबै नअटाए पनि जिल्लास्तरमा भने पनि सार्वजनिक गर्ने परिपार्टी विकास गर्न सके हनन्का घटनाहरूमा कमी आउने बताए ।

कार्यक्रममा नुवाकोट जिल्ला कारागारका प्रमुख टङ्क चिमोरियाले कारागारमा क्षमताभन्दा बढी कैदीबन्दी रहेपनि उनीहरूले पाउनु पर्ने आधारभूत सुविधा दिइरहेको बताए ।

कार्यक्रममा इन्सेक जिल्ला प्रतिनिधि नवदीप श्रेष्ठले जिल्लामा मानव अधिकार हनन् तथा ज्यादतीका २६ ओटा घटनाहरूको बारेमा जानकारी दिएका थिए ।

नवदीप श्रेष्ठ