इन्सेक गतिविधिहरू

स्थानीय तह निर्वाचन ०७४ को निर्वाचन पूर्व अनुगमन अन्तर्गत इन्सेक क्षेत्रीय कार्यालय पोखराको टोलीले निर्वाचनको तयारी, राजनीतिक दलहरूबिचको सम्बन्ध, सुरक्षा अवस्था, सुरक्षा चुनौती, मतदात शिक्षालगायतका विषयमा विभिन्न सरोकारवाला निकायसँग भेटी निर्वाचन पूर्व मानव अधिकारको अवस्था र समग्र निर्वाचानको बारेमा अनुगमन गरेको छ ।

इन्सेक क्षेत्रीय कार्यालय संयोजक शिव खकुरेलको नेतृत्वमा आएको टोलीले वैशाख १२ गते प्रमुख जिल्ला अधिकारी डिल्ली पोख्रेल, जिल्ला प्रहरी कार्यालयका डिएसपी एकनारायण कोइराला, जिल्ला निर्वाचन कार्यालयका प्रमुख महेश पाण्डे, नेपाली काङ्ग्रेसका विष्णु मुस्कान, एमालेका जिल्ला सचिव रामबहादुर चौहान, एमाओवादी केन्द्रका जिल्ला संयोजक ठाकुरकुमार बिक, पत्रकार महासङ्घका अध्यक्ष हिमबहादुर जिसी, अन्तरपार्टी महिला सञ्जालकी अध्यक्ष शुसीला गैरेसँग भेटघाट गरी मानव अधिकार अवस्थाको अनुगमन र निर्वाचनको बारेमा जानकारी लिएको थिएको छ ।

अनुगमनको क्रममा इन्सेक क्षेत्रीय कार्यालयका संयोजक शिव खकुरेलले स्थानीय निर्वाचनलाई स्वच्छ, धाँधलीरहित र शान्तिपूर्ण बनाउनको लागि आफूहरूले निर्वाचनको पूर्व, निर्वाचनको दिन र निर्वाचनपछि तीनै चरणको पर्यवेक्षण गर्ने बताए । साथसाथै इन्सेकले विगत निर्वाचन जस्तै यो निर्वाचनमा पनि स्वच्छ निर्वाचनको लागि नागरिक अभियान सञ्चालन गरिने जानकारी दिए ।

भेटघाटमा प्रमुख जिल्ला अधिकारी डिल्ली पोख्रेलले वैशाख ३१ गतेको निर्वाचनको अन्तिम तयारी गरिरहेको भएपनि सरकारले सारेको बताए । उनले भने-'सुरक्षा, रणनीति, मतदाता शिक्षा, मतदान अधिकृतको कार्यालयलगायतका निर्वाचनसँग सम्बन्धित विषयमा अन्तिम तयारी भइरहेको अवस्थामा सरकारले यहाँ दोस्रो चरणमा निर्वाचन गर्ने निर्णय गरेकाले यहाँका मतदाता तथा सबै क्षेत्रलाई निराशा बनाएको छ ।'

नारायण भुसाल