इन्सेक गतिविधिहरू

ओखलढुङ्गामा क्रियाशील पत्रकारहरूले निर्वाचन आचारसंहिता पालना गर्न प्रतिबद्धता जनाएका छन् । इन्सेकको पहलमा नेपाल पत्रकार महासङ्घ ओखलढुङ्गाले ०७४ वैशाख ९ गते आयोजना गरेको अन्तरक्रिया कार्यक्रममा पत्रकारहरूले निर्वाचन आचारसंहिता पालना गर्न प्रतिबद्धता जनाएका हुन् ।

जिल्लामा सञ्चालित सञ्चारमाध्यमका सञ्चालक र पत्रकारहरूबिच भएको छलफलमा आचारसंहिता पालना र व्यवसायिक मर्यादा पालना गर्ने सहमति भएको नेपाल पत्रकार महासङ्घ ओखलढुङ्गाका सचिव लाक्पा जी. शेर्पाले बताए ।

अन्तरक्रियामा निर्वाचन आचारसंहिता, पत्रकारको दायित्व र सुरक्षा संवेदनशीलताका विषयमा गरिएको छलफलबाट तीन बुँदे लिखित प्रतिबद्धता जनाइएको छ ।

स्थानीय तह निर्वाचनको समयमा पत्रकारिता र सञ्चारमाध्यमबाट समाचार सङ्कलन र सम्प्रेशण गर्दा दलगत प्रचारबाजी नभई समृद्ध स्थानीय तह निर्माण र सङ्घीयता कार्यान्वयनको बारेमा सकारात्मक सन्देश प्रवाह हुने गरी गर्ने, निर्वाचन आचारसंहिताको परिपालना, कार्यान्वयनको अवस्था र पत्रकार आचारसंहिताको पूर्ण पालना गर्न प्रतिबद्ध रहने निर्णय भएको छ ।

त्यस्तै निर्वाचनसम्बन्धी समाचार स्रोतमा पत्रकार, निर्वाचन पर्यवेक्षकहरूबिच साझेदारी, समन्वय, सन्देशमा एकरूपता ल्याउन प्रतिबद्धता जनाइएको छ ।

शिवप्रसाद ढुङ्गाना