इन्सेक गतिविधिहरू

इन्सेक क्षेत्रीय कार्यालय नेपालगञ्जको आयोजनामा छाँयानाथ रारा नपा-४ ताल्चा गाउँमा निर्वाचन अघिको मानव अधिकार अवस्थाका सम्बन्धमा वैशाख ६ गते मतदाताहरूसँग छलफल कार्यक्रम सम्पन्न गरिएको छ ।

छाँयानाथ रारा नपा-४ र ५ का मतदाता सहभागी कार्यक्रमका चिनकला बिकले मतदान गर्न नजानेको बताउँदै मतदाता शिक्षाको आवश्यकता भएको बताइन् । उनले भनिन्-'मतदान पत्र कस्तो हुन्छ ? केही पनि थाहा छैन ।' स्थानीय तहको निर्वाचन नहुँदा गाउँमा विकास नभएको बताउँदै स्थानीयबासी नन्दप्रसाद भामले निर्वाचन हुन लागेकोमा खुसी व्यक्त गरे ।

इन्सेकका साधरण सदस्य कृष्ण मुरारीप्रसाद भट्टले निर्वाचनमा योग्य र सक्षम उम्मेदवारलाई मतदान गर्न अनुरोध गरे । इन्सेक सदस्य भट्टले सक्षम उम्मेदवारले जितेमा समाज बन्ने बताए ।

इन्सेक क्षेत्रीय कार्यालय नेपालगञ्जका प्रलेख अधिकृत नारायण सुबेदीले इन्सेकले स्थानीय तहको निर्वाचनको तीन तहको अनुगमन गर्ने बताउँदै मत माग्न आउने उम्मेदवारलाई जितेपछि गाउँ र समाजमा के विकास गर्नुहुन्छ ? भनी प्रश्न गर्न मतदातालाई अनुरोध गरे ।

महादेव प्रावि ताल्चाका प्रद्यानाध्यापक कृष्णबहादुर रावतले मतदाता शिक्षा सञ्चालन गर्ने सहजकर्ता स्थानीयबासी हुनुपर्नेमा जोड दिए । ताल्चा क्षेत्रको सुरक्षा अवस्था राम्रो भएको बताउँदै सहभागीहरूले कुनै पक्षको डर र धम्की नआएको बताए ।

जीवन सेजुवाल