इन्सेक गतिविधिहरू

नागरिक सङ्घ सङ्गठनका प्रतिनिधिहरूले आगामी स्थानीय तहको निर्वाचनमा बालबालिका प्रयोग नगर्न तथा त्यस्तो कार्य गर्न नदिन आग्रह गर्दै विभिन्न निकायको ध्यानाकर्षण गराएका छन् ।

चैत २९ गते प्रमुख जिल्ला अधिकारीलाई ज्ञापनपत्र बुझाउँदै उनीहरूले निर्वाचनमा बालबालिकाको प्रयोग नगर्न र नगराउन सबै राजनीतिक दलहरूलाई ध्यानाकर्षण गराईदिन माग गरिएको छ ।

नेपाल सरकारले 'बाल अधिकारसम्बन्धी संयुक्त राष्ट्र सङ्घीय महासन्धी १९८९' अनुमोदन गरिसकेको र सरकारको तर्फबाट 'विद्यालय शान्ति क्षेत्र राष्ट्रिय ढाँचा र कार्यान्वयन निर्देशिका २०६८' जारी गरिसकेको स्मरण गराउँदै ज्ञापनपत्रमा निर्वाचन आयोगले जारी गरेको 'निर्वाचन आचार संहिता २०७२' को परिच्छेद २ अन्तर्गत उम्मेदवार, राजनीतिक दल तथा सम्बन्धित व्यक्तिले पालना गर्नु पर्ने आचरणको बुँदा नम्बर (ड) मा निर्वाचन प्रचार प्रसार, आमसभा तथा जुलुसमा बालबालिकाको प्रयोग गर्न वा गराउन नहुने भनि किटान गरिएको छ ।

बालबालिकासम्बन्धी राष्ट्रिय तथा अन्तर्राष्ट्रिय कानुन र निर्वाचन आयोगलेसमेत निर्वाचनमा बालबालिकाको प्रयोगमा बन्देज लगाएको हुँदा यससम्बन्धी व्यवस्था सम्पुर्ण राजनीतिक दलहरूलाई जानकारी गराई निर्वाचनमा बालबालिकाको प्रयोग हुनबाट रोक्ने कार्यमा सहजीकरणको लागि ज्ञापनपत्रमा प्रमुख जिल्ला अधिकारीलाई अनुरोध गरिएको छ ।

मानवअधिकार निगरानी समूह तनहुँका अध्यक्ष रामलिला सुवर्णकार, नेपाल बार एसोसियसनका अध्यक्ष शिवदत्त ढकाल, इन्सेक जिल्ला प्रतिनिधि प्रकाशचन्द्र भट्टराई, राष्ट्रिय निर्वाचन पर्यवेक्षण समिति (नियोक) की अध्यक्ष सोनी खनिया, रिसेडका अध्यक्ष मदन पौडेल, नेपाल पत्रकार महासङ्घ तनहुँका सचिव उज्वल पौडेल, कोशिस राष्ट्रिय मानसिक स्वास्थ्य स्वावलम्वन सङ्गठनका कार्यक्रम संयोजक बसन्त भट्टले हस्ताक्षर गरेको ज्ञापनपत्रमा निर्वाचनको घोषणाले नागरिकमा खुसीको सञ्चार छाएको भन्दै निर्वाचनको प्रक्रिया र मतदानमा कोही कसैको डर, धम्की, दबाव र प्रलोभनमा नपरी निश्पक्ष र भयरहित तरिकाले सहभागी हुन पाउने आम नागरिक तथा मतदाताहरूको अधिकार भएको हुँदा सो अधिकारको सम्मान गर्न पनि अनुरोध गरिएको छ ।

साथै विद्यालयको प्राङ्गणमा राजनीतिक दलको आमसभा तथा जुलुसहरू नगर्न, विद्यालयको भित्ताहरूमा राजनीतिक दल तथा उम्मेदवारको प्रचार प्रसारको सामग्री नलेख्न र पोष्टर नटाँस्न र मतदान केन्द्रहरूलाई अपाङ्गतामैत्री बनाउन पनि ज्ञापनपत्रमा अनुरोध गरिएको छ । सो ज्ञापनपत्र बुझ्दै प्रमुख जिल्ला अधिकारी फणिन्द्रमणी पोख्रेलले अब बस्ने सर्वदलीय बैठकमा यस बारेमा जानकारी गराई बालबालिकाको प्रयोग नगर्न राजनीतिक दलहरूलाई अनुरोध गर्ने बताए ।

प्रकाशचन्द्र भट्टराई