निगरानी समूहद्वारा निर्वाचनको तयारीको सन्दर्भमा सरोकारवालासँग छलफल

मानव अधिकार निगरानी समूह तनहुँले आगामी वैशाख ३१ गतेका लागि तय गरिएको स्थानीय तह निर्वाचनको तयारीको बारेमा प्रमुख जिल्ला अधिकारी र जिल्ला निर्वाचन कार्यालयका अधिकारीसँग छलफल गरेको छ ।

समूहका संयोजक रामलिला सुवर्णकार नेतृत्वको टोली चैत १३ गते सरोकारवाला कार्यालयमा पुगेरै छलफल गरेको हो ।

प्रमुख जिल्ला अधिकारी फणिन्द्रमणी पोख्रेलसँग भेटघाट गरी निर्वाचनको तयारी, निर्वाचनको सुरक्षा व्यवस्था, राजनीतिक दलहरूसँगको समन्वयलगायतका विषयमा जानकारी लिएको थियो ।

सो अवसरमा प्रजिअ पोख्रेलले संविधान कार्यान्वयन गर्न निर्वाचन अपरिहार्य भएको हुँदा सबै राजनीतिक दलको सहयोगमा जिल्लामा निर्वाचनको वातावरण बनाइएको बताए । जिल्लामा निर्वाचनको कुनै चुनौती नरहेको भन्दै प्रजिअ पोख्रेलले सुरक्षा निकायको समन्वय र सहयोगमा निर्वाचनलाई शान्तिपुर्ण र भयरहित बनाउने प्रतिवद्धता जनाए । मतदान स्थल र मतदान केन्द्रको निर्धारणमा राजनीतिक दलहरूको महत्वपुर्ण सहयोग रहेको भन्दै प्रजिअ पोख्रेलले निर्वाचन अवधिसम्म राजनीतिक दलहरूको यस्तै सहयोगको अपेक्षा गरिएको बताए ।

मतदाता शिक्षा कार्यक्रम सबैभन्दा चुनौतीपुर्ण रहेको भन्दै उनले मत बदर हुन नदिन निर्वाचन शिक्षा कार्यक्रम अपरिहार्य रहेको र निर्वाचन पर्यवेक्षण र मानव अधिकार सङ्घसस्थाहरूले नमूना मतदान गरी मतदातालाई प्रशिक्षण दिन अनुरोधसमेत गरेका छन् ।

जिल्ला निर्वाचन कार्यालयका नायव सुब्बा हरिप्रसाद लामिछानेले हालसम्म मतदान केन्द्र र मतदान स्थलको निर्धारण गरिएको र मतदाताहरूको नामावली निर्वाचन आयोगमा पठाइएको जानकारी दिए । निर्वाचन आयोगले मतदाताको अन्तिम नामावली केही दिन भित्रैमा पठाउने र त्यसैलाई अन्तिम नामावली मान्ने पनि उनले बताए ।

जिल्ला निर्वाचन कार्यालयका अनुसार तनहुँमा कुल १ लाख ९६ हजार ४ सय ४२ जना मतदाता रहेका छन् । जसमा व्यास नपामा सबैभन्दा धेरै ३९ हजार २ सय १३, भानु नपामा ३२ हजार ७ सय २४, शुक्लागण्डकी नपामा २९ हजार ७ सय ८८ र भिमाद नपामा १९ हजार ६ सय ८० जना मतदाता रहेका छन् । त्यस्तै गाउँपालिकातर्फ रिसिङमा १४ हजार ७ सय ८१, म्याग्देमा १४ हजार ४ सय ६०, घिरिङमा १२ हजार २ सय ३४, बन्दिपुरमा १२ हजार १ सय ४, आवुँखैरेनीमा ११ हजार ८५ र देवघाटमा १० हजार ३ सय ३५ जना मतदाता रहेका छन् ।

प्रकाशचन्द्र भट्टराई