इन्सेक गतिविधिहरू

स्थानीय सरकार र नागरिक समाजबीच केही मतभेद र तालमेल नमिलेको जिल्लास्थित नागरिक समाजका अगुवाहरूले आरोप लगाएका छन् । उनीहरूले आपसी सहकार्यका लागि वातावरण तयार गर्न स्थानीय तहका प्रतिनिधिहरूलाई आग्रहसमेत गरेका छन् ।

अनौपचारिक क्षेत्र सेवा केन्द्र (इन्सेक) ले सिन्धुलीमाढीमा आयोजना गरेको ‘वर्तमान परिप्रेक्षमा नागरिक समाज तथा स्थानीय सरकारबीच सहकार्यका लागि अवसर र चुनौती’ विषयक अन्तरक्रिया कार्यक्रममा उनीहरूले यस्तो आग्रह गरेका हुन ।

स्थानीय तहका प्रमुख तथा प्रतिनिधिहरू, नागरिक समाजका प्रतिनिधि, पत्रकार, मानव अधिकारबीचमा भएको कार्यक्रममा सहजीकरण गर्दै गैसस महासङ्घ सिन्धुलीका अध्यक्ष बेदराज दाहालले स्थानीय सरकारले गैससहरूलाई उचित समन्वय, नियमन र काम गर्ने वातावरणको सृजना गरी विकासमा साझेदारी गर्नुपर्नेमा जोड दिए ।

दाहालले स्थानीय तह सरकार सञ्चालन, कानुन निर्माणलगायतका विषय नयाँ भएकाले पनि गैससहरूलाई काम गर्न सहज नभएको बताए । नागरिक समाजसँगको सहकार्यले विकासलाई सहज बनाउने बताउँदै उनले स्थानीय सरकारले यसलाई अवसरका रुपमा लिनुपर्नेमा जोड दिए ।

कार्यक्रममा बोल्दै उद्योग वाणिज्य सङ्घ सिन्धुलीका अध्यक्ष अमरेशचन्द्र बैदारले निजी क्षेत्रले नागरिकलाई सहज रूपमा सेवा दिने विषयमा स्थानीय सरकार र स्थानीय सरोकारवालासँग मिलेर काम गर्न तयार रहे पनि तालमेल मिल्न नसकेको बताए ।

कार्यक्रममा बोल्दै नेपाल पत्रकार महासङ्घ प्रदेश ३ का सचिव राजन गाउँलेले गैसस र स्थानीय सरकारबीच विश्वासको वातावरण बन्न नसकेकाले विकासमा बाधा पुगेको बताए ।

यस्तै अधिकारकर्मी सविता कोइरालाले नागरिक समाजका हिजोका कामलाई मुल्याङ्कन गर्दै सहकार्यमा स्थानीय सरकार खुला हुनपर्नेमा जोड दिइन् ।

कमलामाई नगरपालिकाका मेयर खड्ग खत्रीले नागरिक समाज र स्थानीय सरकारबीच विश्वासको सङ्कट भएकाले साझेदारीमा समस्या आएको बताएका छन् ।

मेयर खत्रीले नगरपालिकाले नागरिक समाज र स्थानीय सरकारबीचको दुरी कम गरी विकासमा साझेदारी, पारदर्शिता र जबाफदेहिता कायम गर्न प्रयास गरिरहेको समेत दावी गरे ।

तिनपाटन गाउँपालिकाका अध्यक्ष कर्णबहादुर थापा मगरले नागरिक समाजसँगको सहकार्यमा समेत व्यक्ति र राजनीति हावी भएको बताए । उनले असल र खराब छुट्याएर काम गर्ने वातावरण नभएसम्म पारदर्शिता र स्वतन्त्र छानविन सम्भव नभएकाले पनि नागरिक समाज र स्थानीय सरकारबीच दुरी बढेको बताए । उनले स्थानीय विकासका लागि असल नागरिक समाजसँग व्यवस्थित सहकार्य जरूरी रहेको बताए ।

जिल्ला समन्वय समिति सिन्धुलीका सदस्य गङ्गा कार्कीले आर्थिक समृद्धिका लागि गैसस र सरकारबीच सहकार्य जरूरी रहेको बताइन् । फिक्कल गाउँपालिकाका कार्यपालिका सदस्य खड्गबहादुर सुनुवारले विकासमा स्थानीय सरकारलाई एक्लै हिँड्न चुनौती भएको बताउँदै नागरिक समाजसँगको सहकार्य अवसरका रूपमा लिनुपर्ने बताए । नागरिकका आवश्यकता पुरा गर्न स्थानीय सरकारलाई गाह्रो भएको उल्लेख गर्दै उनले गैससको सहयोग आवश्यक रहेको बताए ।

विमला पाण्डे