इन्सेक गतिविधिहरू

नागरिक समाज र सञ्चार जगतको सहकार्यको अभावमा विकासका जल्दाबल्दा समस्याहरू ओझेलमा परेको सरोकारवालाहरूले बताएका छन् ।

अनौपचारिक क्षेत्र सेवा केन्द्र (इन्सेक) को आयोजनामा फागुन ७ गते विदुर नगरपालिकामा आयोजना गरिएको ‘विकासका लागि नागरिक समाज र सञ्चार जगतको सहकार्य’ विषयक अन्तरक्रियामा विकासमा हुने गरेको ढिलासुस्तीलाई रोक्नको लागि नागरिक समाज र सञ्चार जगतबीचको सहकार्य हुन नसकेको सरोकारवालाहरूले बताएका हुन् ।

नेपाल नागरिक समाजका उपाध्यक्ष केशव मिश्रले विकास निर्माणका योजनाहरूलाई छिटोछरितो रूपमा सम्पन्न गराउनको लागि नागरिक समाज र सञ्चार जगतबीचको सहकार्यको खाँचो रहेको बताए ।

उनले भने–‘नागरिक समाजले यस्ता विषयलाई प्राथमिकता दिएर खोज्ने र त्यसलाई सञ्चार जगतले आम समुदाय र सरोकारवाला निकायसम्म पु¥याउने भूमिका खेल्नु पर्छ । समयमा विकास नहुनु भनेको देशकै क्षति हुनु हो र नागरिकले थप पीडा भोग्नु हो त्यसैले सहकार्यले विकासको गतिलाई तीव्रता दिन सहयोग पुग्छ ।’

गैरसरकारी संस्था महासङ्घका उपाध्यक्ष गोकर्ण नेपालले नागरिक समाज र सञ्चार जगतको सहकार्य भएमा विकासले गति लिने तथा नागरिक समाजको गतिविधि र सरकारी निकायका गतिविधिहरू पारदर्शी हुने बताए ।

नेपाल पत्रकार महासङ्घका जिल्ला अध्यक्ष कपिलदेव खनालले विकासका कामहरूलाई प्रभावकारी र दिगो बनाउनका लागि नागरिक समाज र सञ्चार जगतको भूमिका महत्वपूर्ण हुने बताए । उनले नागरिक समाज र सञ्चार जगतको निगरानीले दिगो विकासमा टेवा पुगी उपभोक्ताहरू लाभान्वित हुने बताए ।

मानव अधिकार एलाइन्सका पूर्व केन्द्रीय सदस्य यमकुमार खातीले नागरिक संस्था र सञ्चार जगतको सहकार्यले समुदायप्रति जिम्मेवार बनाउन भूमिका खेल्ने बताए । उनले नागरिक समाज र सञ्चार जगतको सहकार्यले आवाज विहीनहरूको मुुद्दालाई बाहिर ल्याउने भएकोले समुदाय नै यसबाट लाभान्वित हुने बताए ।

महिला मानव अधिकार रक्षक सञ्जाल नुवाकोटकी पूर्व अध्यक्ष शर्मिला थापामगरले नागरिक समाज र सञ्चार जगतले जातिगत विषय र सांस्कृतिक पक्षहरूमाथि पनि ध्यान दिनु पर्ने बताइन् । उनले स्थानीय सरकारका विकासका गतिविधिहरूमा पनि चासो राख्नुपर्ने बताइन् ।

सहभागीहरूले नागरिक सङ्घसंस्था र सञ्चार जगतले उठाएका विषयहरूलाई सरकारी निकायले गम्भीरतापूर्वक लिनु पर्नेमा त्यसो नभएको गुनासो गरे । सहभागीहरूले आगामी दिनमा नागरिक समाज  र सञ्चार क्षेत्रमा आवद्धहरूले एक अर्का बीच अझै घनीभूत सहकार्य गरेर जानेमा प्रतिबद्धता जनाए ।

नवदीप श्रेष्ठ