इन्सेक गतिविधिहरू

नागरिक समाजको सकारात्मक छवि निर्माणको लागि पारदर्शिता र जवाफदेहिताको खाँचो रहेको नुवाकोटका सरोकारवालाहरूले बताएका छन् ।

चैत ६ गते विदुरमा इन्सेकको आयोजनामा पारस्परिक जवाफदेहिता कार्यक्रम अन्तर्गत 'नागरिक समाजको सकारात्मक छवि निर्माणको सवाल' विषयक अन्तरक्रियामा सहभागीहरूले नागरिक समाजको रूपमा सक्रिय हुनेहरू आफैँमा पारदर्शी र समाजप्रति जवाफदेही भएको खण्डमा नागरिक समाजको सकारात्मक छवि निर्माण हुने बताएका हुन् ।

गैरसरकारी संस्था महासङ्घ नुवाकोटका अध्यक्ष मीनकुमार केसीले सामाजिक सङ्घ संस्थाहरू आफैँ पारदर्शी हुनु पर्ने र आफूले गरेका कामहरूप्रति जवाफदेही भए मात्र सकारात्मक छवि निर्माण हुने बताए । 'नागरिक समाज निपष्क्ष र तटस्थ र निर्भिकताकासाथ आफूलाई सामाजिक मुद्दामा प्रस्तुत गर्न सक्नु पर्छ'-उनले भने-'नागरिक समाजले गर्व गर्ने दिन ल्याउनको लागि आफूले गरेका काममा जवाफदेही र पारदर्शी हुनु पर्छ ।'

नेपाल नागरिक समाजका अध्यक्ष बाबुराम लामिछानेले हामी सबै नागरिक समाजको सदस्य रहेको र यसको कुनै निश्चित सिमा नरहेकोले सामाजिक रूपमा सक्रिय हुने सबै नै नागरिक समाज भएकोले सामाजिक काममा सक्रिय हुनेहरूले आफ्ना काम इमान्दारितापूर्वक गर्नु पर्ने बताए ।

कार्यक्रममा महिला मानव अधिकार रक्षक सञ्जालकी अध्यक्ष शर्मिला थापामगरले नागरिक समाजका सदस्यहरूले राजनीतिक दलहरूभन्दा माथि उठेर आफ्नो अभियान सञ्चालन गर्नु पर्ने बताइन् ।

बेलकोटका भूकम्प पीडित बद्री मिजारले सङ्घसंस्थाहरूले काम गर्दा पारदर्शी रूपमा नगरेकाले नागरिक समाजले त्यसको खबरदारी गर्नु पर्ने बताए ।

कार्यक्रममा पत्रकार, नागरिक समाजका अगुवा, भूकम्प पीडितहरू, सङ्घसंस्थाका प्रतिनिधिलगायतको सहभागिता रहेको थियो ।

नवदीप श्रेष्ठ