इन्सेक गतिविधिहरू

विकासका लागि नागरिक समाज तथा सञ्चार जगतबिच सहकार्य विषयक अन्तर्क्रिया कार्यक्रम चैत २८ गते रामेछापको मन्थलीमा सम्पन्न भएको छ ।

मानव अधिकार संरक्षण सञ्जाल रामेछापको समन्वय तथा युएसएआइडीको सहयोगमा र एफएचआई ३६० सँगको साझेदारीमा अनौपचारिक क्षेत्र सेवा केन्द्र (इन्सेक) ले सो कार्यक्रमको अयोजना गरेको हो ।

पत्रकार महासङ्घ रामेछापका अध्यक्ष रमेश ढुङ्गेलले जिल्लामा रहेका समस्या उठाउने क्रममा सम्बन्धित पक्षसँग छलफल गर्नु जरूरी रहेको बताए । आदिवासी जनजाती महासङ्घका पूर्व अध्यक्ष खड्गबहादुर आले मगरले पुनर्निर्माणको लागि सरकारले दिने भनेको काठ वितरण प्रक्रियामा सरकार उदासिन भएको आरोप लगाए । काठ वितरण प्रक्रियालाई प्रभावकारी बनाउन नागरिक समाज र सञ्चारमाध्यमले भूमिका खेल्नु पर्नेमा उनले जोड दिए ।

मन्थली नगरपालिका-१ की वडा सदस्य एवम् दलित अधिकारकर्मी कमला वसेलले स्थानीय तहको योजना बनाउँदा समेत महिला र दलित प्रतिनिधिहरूको आवाजको सुनुवाइ नहुने गरेको गुनासो गरिन् ।

दलित अधिकारकर्मी गम्भीर बिकले स्थानीय तह सञ्चालन ऐन-२०७४ कार्यान्वनको अवस्थाको बारेमा नागरिक समाज र पत्रकारले खोज गर्नुपर्ने बताए । स्थानीय तहको योजना तर्जुमा प्रक्रियामा सबै पक्षको सहभगिता नरहेको उनले बताए ।

रामेछाप बार एसोसियशनका उपाध्यक्ष यादव दाहालले विकासको काममा सडक खन्ने काम मात्र भएको र त्यसमा पनि डोजर सञ्चालनमा निर्वाचित जनप्रतिनिधिकै प्रत्यक्ष/अप्रत्यक्ष सहभागिता रहेको आरोप लगाए ।

विकास निर्माणका नाममा भइरहेका अनियमितता तथा ठगिको पत्रकार तथा नागरिक समाजलगायतले आवाज उठाएर समास्या पहिचान गरी समाधान गर्नुपर्ने उनको भनाई थियो ।

नवराज पथिक