इन्सेक गतिविधिहरू

नागरिक समाज र स्थानीय सरकारको सहकार्यले स्थानीय तहको विकासमा टेवा पुग्ने सरोकारवालले जोड दिएका छन् ।

अनौपचारिक क्षेत्र सेवा केन्द्र (इन्सेक) भक्तपुरले फागुन १४ गते आयोजना गरेको "वर्तमान परिप्रेक्ष्यमा नागरिक समाज तथा स्थानीय सरकार बीचका सहकार्य अवसर र चुनौतिहरू" विषयक छलफल कार्यक्रममा सहभागीले यस्तो बताएका छन् ।

कार्यक्रममा नेकपा एमाले युवा नेता तथा प्रतिनिधिसभा सदस्य महेश बस्नेतले नागरिक समाजसँग सहकार्य गरेर अगाडि बढ्न सके विकासले फड्को मार्ने बताए ।

"जनतासँग प्रत्यक्ष सरोकार राखेर काम गर्ने निकाय स्थानीय सरकार हो, तर पछिल्लो समयमा हामी जनताको प्रतिनिधि हो भन्ने भुलेर हामी शासक हौँ, कि भन्ने दम्भ र घमण्ड जनप्रतिनिधिहरूमा बढ्दै गएको छ, यसले विकासलाई बाधा पुर्‍याउन सक्छ ।'

नगर प्रमुख, उपप्रमुख, वडा अध्यक्ष जस्ता जनप्रतिनिधिको दम्भले स्थानीय सरकारको कुनै पनि काम बिग्रन नहुनेमा जोड दिँदै उनले भने-"जनप्रतिनिधिको दम्भले जिल्लाको स्थानीय तहको काम बिग्रनु हुदैन, उसँग जोडिएका समग्र जनताको भविश्य बिग्रनु हुदैन ।"

स्थायी सरकारले कतिपय अवस्थामा विकृति पनि भित्र्याउँछ भन्ने चरितार्थ अहिलेका केही जनप्रतिनिधिले देखाएको बस्नेतले बताए । उनले भने-"स्थायी सरकारमा पनि विकृति आउँदो रहेछ, स्थायी सरकारले अनावश्यक काम गर्दा पनि जनताले सहनै पर्ने रहेछ, पाँच वर्षसम्म कसैले हटाउन सक्दैनन्, जे गरे पनि हुन्छ भन्ने दम्भ हटाउन के गर्न सकिन्छ भनेर नयाँ बहस सुरू गर्न आवश्यक छ ।" जनप्रतिनिधिले चारकिल्ला प्रमाणित र भूमिसुधारको काम गरेर दैनिक समय बिताउँदै आएकोप्रति टिप्पणी गर्दै उनले रातो कलमले सहि गर्न मात्रै जनप्रतिनिधि नभएकाले विकास निर्माण र अन्य काममा पनि ध्यान दिनु पर्नेमा जोड दिए ।

कायक्रममा जिल्ला समन्वय समिति भक्तपुरकी उपप्रमुख सरिता कुँवरले सहकार्यमै काम गर्नुपर्ने बताइन् । भक्तपुरका सहायक प्रमुख जिल्ला अधिकारी जयकुमार घिमिरले नागरिक समाजले स्थानीय सरकारसँग काम गनुपर्ने र सबै स्थानीय तहको अनुगमन पनि गनुपर्ने कुरामा जोड दिए । सहकार्य नै सबैभन्दा ठुलो कुरा भएको उनको भनाइ छ ।

कार्यक्रममा अनौपचारिक क्षेत्र सेवा केन्द्र (इन्सेक) काठमाडौँका क्षेत्रीय कार्यलय संयोजक कृष्ण गौतमले स्थानीय सरकार र नागरिक समाजबीचको सहकार्य आवश्यक रहेको बताए । सहकार्यको साथ अगाडि बढ्यो भने विकाश हुने उनले बताए ।

सूर्यविनायक नगरपालिकाकी उपप्रमुख जुना बस्नेत, चाँगुनारायण नगरपालिकाकी उपप्रमुख विणा बास्तोला, नेपाल पत्रकार महासङ्घ भक्तपुरका अध्यक्ष पुष्करराज बुढाथोकी लगायतले स्थानीय तहको विकास र प्रगतिका लागि नागरिक समाज जनप्रतिनिधि मिलेर कार्य गर्नुपर्ने बताए ।

सविना केसी