इन्सेक गतिविधिहरू

नागरिक समाज पारस्पारिक जबाफदेहिता परियोजना अन्तर्गत इन्सेकको आयोजनामा ओखलढुङ्गामा नागरिक समाजका संस्थाहरूको स्वःनियमन र आन्तरिक सुशासन विषयक अर्न्तक्रिया कार्यक्रम भदौ १९ गते ओखलढुङ्गामा सम्पन्न भएको छ ।

अर्न्तक्रिया कार्यक्रममा स्थानीय तह सञ्चलानमा आएपछि गैससहरूको कार्य प्रकृति र प्रक्रियाका बारेमा छलफल गर्दै पारदर्शिता कायम गर्न कसरी सकिन्छ भन्ने विषयमा सहभागीहरूले आ-आफ्ना धारणा राखेका थिए ।

नेपाल बार एसोसियशनका सदस्य मेघहरि आचार्यले नागरिक समाजका संस्थाहरूबिच बलियो एकता र समन्वय अभाव हुँदा साझा सवालमा साझा बुझाइ हुन नसकेको बताए । उनले अहिले स्थानीय तह क्रियाशील रहेको अवस्थामा जनप्रतिनिधि र प्रशासनिक निकायबिच समन्वय गर्नका लागि यसले जोड दिएको बताए ।

गैरसरकारी संस्था महासङ्घका सचिव टिका भुजेलले गैरसरकारी संस्थाहरूका कामका बारेमा जिल्ला प्रशासन कार्यालय र स्थानीय तहले विवरण माग गर्ने काम भए पनि समन्वयको अभावले उपलब्ध गराउन नसकिएको बताए ।

उनले यो अन्तक्रियाबाट त्यस्ता निकायमा समन्वय गर्न साझा बुझाइ भएकाले सहज भएको बताए । राष्ट्रिय कृषक समूह महासङ्घका जिल्ला अध्यक्ष हितराज कार्कीले अहिले स्थानीय तहले पनि गैससको नविकरणमा सिफारिस अनिवार्य गर्ने र जिल्ला समन्वय समितिले पनि गर्ने हुँदा दोहोरो मापदण्डबारे पैरवी गर्न आवश्यक रहेको बताए ।

त्यसैगरी सहास नेपालका तेजकुमार राईले गैससहरूको लेखा परीक्षणमा विल भरपाइ बिनै प्रतिवेदन तयार हुने गरेकाले विल भरपाइ दुरुस्त राख्ने र सरोकारवालाहरूलाई कामको अभिमूखीकरण गराउनु पर्ने बताए ।

शिवप्रसाद ढुङ्गाना