इन्सेक गतिविधिहरू

आम नागरिकको चासोको मुद्दामा नागरिक समाज र सञ्चारकर्मीहरू एक हुनुपर्नेमा हेटौँडामा आयोजित एक कार्यक्रमका सहभागीहरूले जोड दिएका छन् ।

इन्सेक नेपालको आयोजनामा असोज ४ गते हेटौँडामा आयोजित ‘विकासका लागि नागरिक समाज तथा सञ्चारजगत बीचको सहकार्य’ विषयक अन्तरक्रिया कार्यक्रममा सहभागीहरूले नागरिकको अधिकारका सवालमा नागरिक समाज र सञ्चारकर्मीहरूले छुट्टाछुट्टै आवाज उठाउँदै आएकाले प्रभावकारी बन्न नसकेको भन्दै अबका दिनमा त्यस्ता विषयहरूमा सहकार्य गरी अघि बढ्ने प्रतिबद्धता व्यक्त गरेका हुन् ।

नेपाल पत्रकार महासङ्घ मकवानपुर शाखाका उपाध्यक्ष सरीता दाहालले नागरिकका खाद्य सुरक्षा, स्वास्थ्य र शिक्षाका क्षेत्रमा सञ्चारकर्मीहरूले विभिन्न विषयहरु उठान गरेपनि नागरिक समाजका अगुवा संस्थाहरूले चासोका साथ नलिँदा सम्बन्धित निकायको ध्यान पुग्न नसकेको बताइन् ।

सञ्चारकर्मीहरूले उठान गरेका विषयवस्तुहरू नागरिक समाजका व्यक्तिहरूले पनि सँगै उठान गरे सम्बन्धित निकायको ध्यान जाने र समाधानको लागि सार्थक पहल हुने उनको धारणा छ ।

नागरिक समाज मञ्चकी संयोजक रमिला सापकोटाले शिक्षा, स्वास्थ्य र खाद्य सुरक्षाको अधिकारको पूर्णता नभएसम्म समाजमा भएका भौतिक विकासको अर्थ नरहने बताइन् ।

समाजमा जतिसुकै भौतिक विकास भएपनि आम मानिसको विकासका लागि शिक्षा, स्वास्थ्य, खाद्य सुरक्षा र अधिकार प्रत्याभूत हुनुपर्नेमा उनको जोड रहेको छ ।

कोक्याप नेपालका उपाध्यक्ष दिपेन्द्र ढकालले विकासका चरणहरूमा भौतिक विकाससँगै आम मानिसको स्वास्थ्य, शिक्षा र खाद्य अधिकारको सुनिश्चितताको विकास पनि अनिवार्य रहेको बताए ।

उनले अब त्यस्ता विषयहरूका सवाल र उठान भएका विषयवस्तुहरूमा नागरिक समाज र सञ्चारकर्मीले आवाजसँगै कलम चलाउन आग्रह गरे ।

पुष्पराज अधिकारी