इन्सेक गतिविधिहरू

राप्ती उपक्षेत्रीय अस्पताल विकास समिति तथा स्थानीय शान्ति समिति दाङले द्वन्द्वपीडितहरूको उपचारलाई सरल र प्रभावकारी बनाउने प्रतिवद्धता जनाएका छन् ।

इएलपी कार्यक्रम अन्तर्गत इन्सेकले चैत २० गते घोराहीमा सेवाप्रदायक निकाय र सेवाग्राहीबिच आयोजना गरेको जिल्लास्तरीय अन्तरक्रिया कार्यक्रममा बोल्दै राप्ती उपक्षेत्रीय अस्पतालका अध्यक्ष शङ्करसिंह थापा र स्थानीय शान्ति समिति दाङका संयोजक नेत्रप्रकाश पाण्डेले द्वन्द्वपीडितको उपचारका लागि राप्ती उपक्षेत्रीय अस्पतालमा सञ्चालन भएको ढाड, हाडजोर्नी तथा कृत्रिम हात, गोडा राख्ने सेवालाई पीडितमैत्री बनाउने प्रतिवद्धता जनाएका छन् ।

उपक्षेत्रीय अस्पतालबाट गत फागुन ८ गतेदेखि सुरु भएको उपचार सेवा प्रभावकारी नभएको, पीडितमैत्री व्यवहार नभएको र उपचारका लागि आवश्यक भौतिक पुर्वाधारको समेत व्यवस्था नगरिएको भन्ने द्वन्द्वपीडितहरूको गुनासो आएको थियो ।

जिल्लास्तरीय मानव अधिकार निगरानी समूहले द्वन्द्वपीडितका गुनासोहरू सम्वोधनको माग गरेपछि अस्पताल विकास समिति र समन्वयको भूमिका खेलिरहेको स्थानीय शान्ति समितिले उपलव्ध स्रोतसाधनको उपयोग गर्दै सरल र पीडितमैत्री सेवा प्रवाह गर्ने प्रतिवद्धता जनाएका हुन् ।

निगरानी समूहले निर्देशिकाबमोजिम द्वन्द्वपीडितहरूले शरीरमा भएका गोलीका छर्रा निकाल्ने सुविधा नपाएको, बिरामीले पाउने आतेजाते यातायात खर्च नपाएकोलगायतका गुनासा राखेका थिए । अस्पताल विकास समितिका अध्यक्ष थापाले विशेषज्ञ डाक्टर र मनोविमर्शकर्ताको अभावमा सेवालाई प्रभावकारी बनाउन नसकिएपनि उपलव्ध स्रोतसाधनको सदुपयोग गर्दै सेवालाई प्रभावकारी बनाउने बताए ।

निगरानी समूहका प्रतिनिधिले लिखित रूपमै शिक्षा, स्वास्थ्य र खाद्य अधिकारका विषयलाई समेटेर सेवाप्रदायक निकायका प्रमुख तथा प्रतिनिधिसमक्ष गुनासा राखेका थिए । निगरानी समूहले पाठ्यपुस्तक सहज रूपमा उपलब्ध गराउन बेलैमा पहल गरिनुपर्ने, शिक्षक दरबन्दी मिलान गरिनुपर्ने, विद्यालयलाई लैङ्गिकमैत्री बनाउनुपर्ने, ग्रामीणस्तरका स्वास्थ्य चौकी अझै पनि १० देखि ५ बजेसम्म खुल्न नसकेको भन्दै कार्यालय समयसम्म सेवा प्रदान गरिनुपर्ने, समयमै औषधि पुर्‍याउनुपर्ने, कृषि उपजमा बढ्दो विषादीको प्रयोग रोक्नुपर्ने, कृषकलाई जैविक विषादीको निर्माण तालिम दिनुपर्ने, पशु विमा, बाली विमाबारे कृषकहरूलाई जानकारी गराउनुपर्ने, बजार अनुगमनलाई नियमित गरिनुपर्नेलगायतका सवालहरू सेवाप्रदायक निकायका प्रमुख तथा प्रतिनिधिहरूलाई सुनाएका थिए ।

जबाफमा सेवाप्रदायक निकायहरू शिक्षा कार्यालय, जनस्वास्थ्य कार्यालय, कृषि विकास कार्यालय, पशुसेवा कार्यालय, महिला तथा बालबालिका कार्यालय, राप्ती उपक्षेत्रीय अस्पताल, स्थानीय शान्ति समितिले कार्यालयबाट दिइने नागरिक सेवालाई प्रभावकारी बनाउने प्रतिवद्धता जनाएका थिए ।

सो अवरमा बोल्दै नागरिक समाज दाङका संयोजक टीकाराम रेग्मीले सेवाग्राहीलाई सचेत बनाउने र सेवाप्रदायकलाई जिम्मेवार बनाउन इन्सेकले महत्वपूर्ण भूमिका खेलेको बताए । इन्सेक क्षेत्रीय कार्यालय, नेपालगञ्जका संयोजक भोला महतले नागरिकका सामाजिक, आर्थिक, सांस्कृतिक अधिकारको रक्षा गर्न इन्सेकले यस्ता छलफलको कार्यक्रम गरिरहेको जानकारी दिए ।

जे एन सागर