इन्सेक गतिविधिहरू

महिला तथा बालबालिका कार्यालय दैलेख र मानव अधिकार निगरानी समूह लाँकुरीको संयुक्त आयोजनामा डुङ्गेश्वर गाउँपालिका-२, लाँकुरीमा चैत २ गते बालविवाह रोकथामका लागि समुदायको भूमिका विषयमा अन्तरक्रिया गरिएको छ ।

कार्यक्रममा इन्सेक मध्यपश्चिमाञ्चल क्षेत्रीय कार्यालयकी फोकल पर्सन सरस्वती मल्लले बालविवाह रोकथामका लागि समुदायले नै पहल गर्नुपर्ने बताउँदै गैरसरकारी क्षेत्र वा नागरिक समाजले सहयोगीको भूमिका मात्र खेल्ने विचार राखिन् । उनले बालविवाह सामाजिक समस्या भएकाले समुदायको अग्रसरता जरूरी हुने औँल्याइन् ।

कार्यक्रममा जनकल्याण मावि सेर्माकोटका विद्यालय व्यवस्थापन समितिका अध्यक्ष भूपेन्द्र बिकले बालविवाहले पार्ने आर्थिक, सामाजिक हानी नोक्सानीका बारे अझै जनचेतना आवश्यक रहेको विचार राखे ।

जिल्ला स्तरीय मानव अधिकार निगरानी समूह दैलेखका संयोजक ज्योती कटुवालले समाजमा हुने अन्याय अत्याचारका विषयमा खुलेर बोल्न सके पीडितलाई न्याय दिलाउन सहज हुने तर्क राखे ।

कार्यक्रममा महिला तथा बालबालिका कार्यालयका बालसंरक्षण निरीक्षक गोविन्द खत्री, नेपाली कङ्ग्रेसका पदम बुढा, एमालेका रूद्रबहादुर विष्टलगायतले बालविवाह रोकथामका लागि समुदायको भूमिकाका विषयमा आआफ्नो विचार राखेका थिए ।

कार्यक्रममा स्थानीय राजनीतिक दल, सरकारी निकाय, सामाजिक अगुवा तथा नागरिक समाजहरूले लाँकुरीमा बालविवाह कुनै पनि बाहनामा स्वीकार्य नहुने र बालविवाह रोकथाममा जुट्ने सामूहिक लिखित प्रतिवद्धता जनाएका छन् ।

अमर सुनार