इन्सेक गतिविधिहरू

स्थानीय युवा उत्तम पन्थीले विभिन्न प्रलोभन देखाएर पार्टी प्रवेश गराउने दलको चङ्गुलमा दलित समुदाय सधैँ फस्दै आएको बताए । 'चुनावका बेला यो समुदायका मतदाता थुप्रै पार्टीमा प्रवेश गर्छन ।'-पन्थीले भने-'चेतनाको कमी र विपन्नताको फाइदा दलहरूले लिइरहेका छन् ।'

स्वच्छ निर्वाचनका लागि नागरिक अभियानको सचिवालय इन्सेक क्षेत्रीय कार्यालय पोखराको टोलीसँग कुरा गर्दै दलित अगुवाले यस्तो गुनासो गरेका हुन् ।

'कस्तो नेता छान्ने ? उनीहरूले आफू बुझने कुरा हो ।'-उनले भने-'चेतना छैन । विद्युतका मिटर र पाइप पाउने आशमा आस्था र मत बेचिएका छन् ।' नेपाली काङ्ग्रेसको तर्फबाट रेसुङ्गा नगरपालिका ७ को वडा सदस्यमा सिफारिस भएकी ३५ वर्षीया मैयाँ बिकले हिम्मतले उठेपनि आफ्नै दिदी बहिनीबाट असुरक्षित भएको बताइन् । 'जुन दलको भएपनि १४/१५ घर दलित बस्तीमा एउटा सदस्य पाइयो ।'-उनले भनिन-'तर, सबै नमिले यो पनि असुरक्षित छ ।'

'मलाई चुनावले खुसी होइन पीडा दिएको छ ।'-रेसुङ्गा नगरपालिका-७ का ३२ वर्षीय बावुराम बिकले भने-'विपन्नलाई के को चुनाव ? धेरैलाई भोट दिएका छौँ ।'-उनले भने-'खै दलितका निम्ति केही परिवर्तन भएन ।' उनले काम गर्नेको लागि एक दिन वा एक घण्टा ठूलो हुने बताए । उनले चुनावमा आफूहरूलाई भोटको पकेट क्षेत्र मात्र बनाइएको आरोप लगाए ।

सोही ठाउँका ५१ वर्षीय चेतमान चुँदराले दलितहरू एकजुट नभएकै कारण गैरदतिलबाट पीडित बन्नुपरेको गुनासो राखे । 'अरू बेला पीडा र सम्वेदनाका कुरा गर्ने ?'-उनले भने-'चुनावको बेला दलित समुदायहरू नै विभाजन हुने भएकाले समस्या उत्पन्न हुन्छ ।' चुँदराले जहिले पनि दलित समुदाय चुनावको बेला मात्र उपयोग भइरहेको बताए ।

जिल्लामा निर्वाचन पुर्वको अवस्थाका बारेमा अनुगमनका लागि आएका इन्सेक क्षेत्रीय कार्यालय पोखराका संयोजक शिव खकुरेलले दलित समुदायलाई मताधिकारका बारेमा जानकारी गराएका थिए । उनले निर्वाचनका बेला प्रलोभन र डर धम्कीका कारण कसैलाई पनि भोट नदिन दलित मतदातालाई आग्रहसमेत गरे । उनले कसरी मत सुरक्षित गर्ने र कस्तो उमेदवार छान्ने भन्ने विषयमा पनि दलित समुदायसँग छलफल गरेका थिए ।

टोपलाल अर्याल