तथ्यपूर्ण रूपमा घटना सार्वजनिकीकरण गरिएका कारण इन्सेकको विश्वनीयताः न्यायधीश चोङ्टेङ्ली

  ०७४ जेठ २७ गते

अनौपचारिक क्षेत्र सेवा केन्द्र (इन्सेक) तेह्रथुमको आयोजनामा जेठ २६ गते नेपाल मानव अधिकार वर्ष पुस्तक २०१८ का लागि अर्धवार्षिक रूपमा सङ्कलित मानव अधिकार उल्लङ्घन तथा ज्यादतीका घटनाको प्रकाशन पूर्व समीक्षा कार्यक्रम सम्पन्न भएको छ ।

Photo20170610Terhathum

पूर्व समीक्षा कार्यक्रममा जिल्ला अदालत तेह्रथुमका न्यायाधीश ईन्द्रकुमार चोङ्टेङ्लीले मानव अधिकारका घटनाहरू तथ्यपूर्ण रूपमा सार्वजनिकीकरण गरिएका कारण नै इन्सेकको विश्वसनीयता बढ्ने गरेको बताए । उनले जिल्लामा सार्वजनिक हुने महिलासम्बन्धी मुद्दाहरूमा अनुसन्धान गर्ने क्रममा पीडित भनिएका व्यक्तिहरूले नै न्याय पाउने उदाहरणहरू प्रशस्त रहेको उल्लेख गरे । उनले इन्सेकले सार्वजनिक गर्ने नेपाल मानव अधिकार वर्ष पुस्तक जिल्लामा हुने घटनाको सूचकाङ्कलाई निर्देश गर्ने भएकाले आगामी दिनमा अझ तथ्यपरक र विश्वसनीय हुनुपर्ने सुझावसमेत दिए ।

कार्यक्रममा प्रमुख जिल्ला अधिकारी अस्मान तामाङले तथ्याङ्कलाई हेर्दा अझै पनि महिलाहरूमाथि हुने हिंसामा कमी हुन नसकेकोप्रति चिन्ता व्यक्त गरे । उनले कानुनले अपराधीहरूलाई छुट नदिने बताए । प्रजिअ तामाङले महिला हिंसालाई न्यूनीकरण गर्न सबैले सचेतनामूलक कार्यक्रम गर्न आवश्यक रहेको उल्लेख गरे ।

नागरिक समाजका अध्यक्ष तुलसी सङ्ग्रौलाले घटना सङकलनका लागि जिल्लाका विभिन्न क्षेत्रमा सञ्जाल बनाउन सके प्रभावकारी हुने सुझाव दिए । उनले अझै पनि गाँउ घरमा हुने महिला हिंसाका घटनाहरू सार्वजनिक नहुँदा अपराध गर्नेहरूको मनोबल बढ्ने गरेको धारणा राखे ।

कार्यक्रममा इन्सेक तेह्रथुमका जिल्ला प्रतिनिधि भगिश्वर लिम्बुले सार्वजनिक गरेको प्रतिवेदनमा अधिकांश ज्यादती गैरराज्य पक्षबाट भएको उल्लेख छ ।

सन् २०१७ जनवरी १ देखि पाँच महिनाको अवधिमा कुटपिटबाट तीनजना, बलत्कार र प्रयासबाट चारजना, घरेलु हिंसाबाट दुईजना र बालविवाहका कारण एक जना गरी १० जना पीडित भएको घटना सार्वजनिक गरिएको थियो ।

इन्सेक क्षेत्रीय कार्यालय, विराटनगर