जिल्ला स्तरीय मानव अधिकार निगरानी समूहको आयोजनामा अन्तरक्रिया सम्पन्न

  ०७४ वैशाख २८ गते

अनौपचारिक क्षेत्र सेवा केन्द्र (इन्सेक)को पहलमा गठित जिल्ला स्तरीय मानव अधिकार निगरानी समूह पाल्पाले वैशाख २८ गते स्थानीय तह निर्वाचनको तयारी र मानव अधिकारकर्मीको भूमिका विषयमा अर्न्तक्रिया गरेको छ ।

अन्तरक्रियाका क्रममा जिल्ला निर्वाचन कार्यालय पाल्पाकी जिल्ला निर्वाचन अधिकारी धर्मा अर्यालले स्थानीय तह निर्वाचनको लागि कार्यालयको तर्फबाट गर्नुपर्ने तयारी तीव्र रूपमा भइरहेको बताइन् ।

फोटो सहितको मतदाता नामावली जिल्लामा आइसकेको र त्यसलाई मिलाउने काम भइरहेको उनले बताइन् । पाल्पामा १ लाख ६२ हजार २ सय ५३ मतदाता रहेको र २ सय १२ मतदान केन्द्र तथा १ सय १८ मतदान स्थल रहेको उनले बताइन् ।

निर्वाचनका लागि ६४ प्रकारका सामग्री निर्वाचन कार्यालयमा आइपुगेका छन् । सुरक्षाकर्मी बाहेक पाल्पामा १ हजार ३ सय भन्दा बढी कर्मचारी निर्वाचनका लागि खटिने अर्यालले बताइन् । उनले निर्वाचनको निष्पक्ष पर्यवेक्षणका लागि मानव अधिकारकर्मीलाई आग्रह समेत गरिन् ।

सो अवसरमा मानव अधिकार निगरानी समूहका संयोजक भगवान भण्डारी, मानव अधिकारकर्मी पुष्करराज रेग्मी, पत्रकारलगायतले मतदाता शिक्षा कार्यक्रमलाई प्रभावकारी रूपमा अगाडि बढाउन आग्रह गरे ।

यज्ञमूर्ति तिमिल्सिना