इन्सेक गतिविधिहरू

मानव अधिकार अवस्थालाई थप प्रभावकारी र सुदृढीकरण गर्न पुस २२ गते मानव अधिकार एलाइन्सका अध्यक्ष हिमाल खड्काको अध्यक्षतामा ११ सदस्यीय जिल्लास्तरीय मानव अधिकार निगरानी समूह गठन गरिएको छ ।

अनौपचारिक क्षेत्र सेवा केन्द्र (इन्सेक)ले सञ्चालन गरेको स्थानीय समुदायलाई सचेत पार्दै जिम्मेवार निकायलाई जबाफदेही बनाउन पहल गर्ने परियोजना अन्तर्गत सदरमुकाम गाईघाटमा आयोजित एक कार्यक्रमकाबिच उदयपुरमा जिल्लास्तरीय मानव अधिकार निगरानी समूह गठन गरिएको हो ।

समूहको सदस्यहरूमा महिला मानव अधिकार रक्षक सञ्जालकी सदस्य माया भण्डारी, उज्यालो नेटवर्कका पत्रकार सुमित्रा कोईराला, गैरसरकारी संस्था महासङ्घ उदयपुरका सचिव सिएम गुरगाई, करुणा सामुदायिक हेरचाह केन्द्रका सचिव सागर नेपाल, त्रियुगा एक्सप्रेस दैनिककी पत्रकार जयन्तिकला तामाङ, त्रियुगा वचाउ अभियानका सदस्य शसी तुलाधार, नेस्पेकका कोषाध्यक्ष पाण्डु परियार, रेडियो उदयपुरकी पत्रकार रञ्जु दनुवार, बालअधिकार सञ्जालका सल्लाहकार भुवन दाहाल र पेसोकका सदस्य शम्भुप्रसाद साह रहेका छन् ।

समूह गठन पछि बोल्दै अध्यक्ष खड्काले समूहले आगामी दिनमा जिल्लाको मानव अधिकासँग जोडिएका आर्थिक, सामाजिक र सांस्कृतिक अधिकारलाई स्थापित गराउन लागि पर्ने बताए । उनले नागरिक तथा राजनीतिक अधिकारको सवालहरू उठिरहेको परिप्रेक्ष्यमा आर्थिक, सामाजिक र सांस्कृतिक अधिकारसँग जोडिएका शिक्षा, स्वास्थ र खाद्य अधिकारमा जोड दिने प्रतिबद्धता व्यक्त गरे ।

भरत खड्का