इन्सेक गतिविधिहरू

वरिष्ठ कृषि विकास अधिकृत रमेशचन्द्र सुवेदीले कृषिलाई व्यवसायिक बनाउन सरकारले लगानी बढाएको बताएका छन् । अनौचारिक क्षेत्र सेवा केन्द्र (इन्सेक)ले दैलेख सदरमुकाममा चैत १९ गते आयोजना गरेको सेवा प्रवाहसम्बन्धी बहस बैठकमा उनले यस्तो धारणा राखेका हुन् ।

सेवाग्राहीहरूका जिज्ञासाको जबाफ दिँदै उनले कृषिलाई आधुनिकीकरण र व्यवसायिक बनाउन हाते ट्रयाक्टर लगायतका उपकरण, उन्नत जातका बीउविजन र अरु थप अनुदानका कार्यक्रम दिइएको तर सरकारले सोचे जस्तो कृषिलाई व्यवसायिक बनाउन नसकिएको बताए ।

अधिकृत सुवेदीले परम्परागत खेती प्रणाली, युवा जनशक्ति वैदेशिक रोजगारमा पलायन हुने गरेको अवस्था, सीमित श्रोत साधनको कारण सिञ्चाई सुविधा पुर्‍याउन नसक्दा आशा गरेजस्तो प्रगति नभएको बताए ।

विद्यालय निरीक्षक शान्ति विष्टले यो वर्षशैक्षिक सत्रको सुरुमै सबै विद्यालयमा पाठ्यपुस्तक पुगिसक्ने बताइन् । अघिल्लो वर्षकक्षा ९ को नयाँ पाठ्यक्रम लागु हुँदा देशभर अभाव भएको घटनाले यस वर्षसावधानिपूर्वक समयमा पाठ्यपुस्तक उपलब्ध गराउने जिल्ला शिक्षा कार्यालयले लक्ष्य लिएको उनले जानकारी दिइन् ।

कार्यक्रममा महिला विकास अधिकृत अनिता ज्ञवालीले दैलेखमा बालविवाह विकराल समस्या रहेकोले सबैको साझा पहलबाट न्यूनीकरण गर्नुपर्ने आवश्यकता औल्याँइन् । बालविवाहले समाजका सबै पक्ष र क्षेत्रलाई असर पार्ने भएको कारण सामुदायिक प्रयास आवश्यक रहेको उनको भनाइ छ ।

जिल्ला पशु सेवा कार्यालयका स्थानीय समस्याहरूका विषयमा स्थानीयले उठाएका प्रश्नहरूको जबाफ दिँदै वरिष्ठ पशु चिकित्सक डा. शितलबाबु श्रेष्ठले कृषकहरूले अपेक्षाकृत फाइदा लिन नसकेको बताए । प्राविधिक जनशक्तिको अभाव भएकै कारण जिल्ला पशु सेवा कार्यालयले ग्रामीण पशु स्वास्थ्य कार्यकर्ताहरू करारमा पठाएको उनले जानकारी दिए ।

अमर सुनार