इन्सेक गतिविधिहरू

इन्सेक कञ्चनपुरको संयोजन र राष्ट्रिय मानव अधिकार आयोग, धनगढीको आयोजनामा चैत २२ गते कञ्चनपुरको महेन्द्रनगरमा चौथो मानव अधिकार राष्ट्रिय कार्ययोजनाको कार्यान्यवन विषयमा अन्तरक्रिया गरिएको छ ।

चौथो मानव अधिकार राष्ट्रिय कार्ययोजना र कार्यान्यवन विषयक अन्तरक्रिया कार्यक्रममा विषयगत सरकारी कार्यालयका प्रमुख तथा प्रतिनिधिहरूले आआफ्ना कार्यालयले सम्पन्न गरेका कार्यक्रम र सेवा प्रवाहको स्थितिका बारेमा जानकारी गराएका थिए ।

महाकाली अञ्चल अस्पतालका निमित्त निर्देशक रोजन ताम्राकारले दरबन्दी अनुसार चिकित्सक नभएका कारण सेवा दिन नसकिएको बताए । रिक्त रहेका दरबन्दी परिपुर्तिका लागि सम्बन्धित निकायहरूको ध्यानकर्षण गराइदिन इन्सेक र राष्ट्रिय मानव अधिकार आयोगलाई आग्रह गरेका थिए ।

मानव अधिकार निगरानी समूहकी संयोजक पुनमसिंह चन्दले स्थानीय तहमा पाइने सेवा सुविधामा समेत अन्योल रहेको भन्दै सेवा सुविधाका बारेमा नागरिकहरूलाई जानकारी गराउनु पर्ने बताइन् ।

जिल्ला समन्वय समितिका उपप्रमुख सानुमैया वुडथापाले मानव अधिकार संरक्षण र सम्बर्द्धनका लागि प्रतिबद्ध रहेको र सेवा प्रवाह चुस्तदुरूस्त राख्न स्थानीय तहहरूलाई पत्राचार गरिने बताइन् ।

कोमलनिरन्जन भाट