इन्सेक गतिविधिहरू

अनौपचारिक क्षेत्र सेवा केन्द्र (इन्सेक) सिन्धुपाल्चोकको आयोजनामा भदौ १३ गते जिल्ला सदरमुकाम चौतारामा भूकम्प पश्चात पुनःनिर्माण विषयक सार्वजनिक सुनुवाइ कार्यक्रम सम्पन्न भएको छ ।

राहतको नाममा एनजिओ र आइएनजिओहरूले जनमूखी काम नगरी उनीहरूको स्वार्थ अनुरूप काम गरेको, चौतारा नगरपालिकाभित्र सबै भूकम्प पीडितले पहिलो किस्ताको रकम पाएको भनिए पनि वडा नं. २ का भूकम्प पीडितहरूले नपाएको, स्थानीय निकाय नहुँदा समाजमा हिंसात्मक घटनामा वृद्धि भएको, अपाङ्गता बालबालिकाहरूले छात्रवृद्धि नपाएकोलगायतका जिज्ञासाहरू सहभागीहरूले राखेका थिए ।

कार्यक्रममा जिल्ला प्रहरी कार्यालयका प्रमुख एसपी रबिन्द्र केसीले नागरिकहरूको शान्ति सुरक्षा गर्ने दायित्व प्रहरीको भएकोले नागरिकहरूको सहयोगमा प्रहरीले लिएको जिम्मेवारी पुरा गर्ने बताए । एसपी केसीले आफ्नो अधिकार लिने नाममा अरूको अधिकार कसैले पनि खोस्न नहुने र कानुनलाई सबैले पालना गर्नुपर्ने बताए ।

त्यसैगरी चौतारा नगरपालिकाका कार्यकारी प्रमुख तथा पुनःनिर्माण प्रधिकरणका जिल्ला संयोजक भुवनेश्वर लामिछानेले चौतारा नगरपालिका वडा नं. २ का भूकम्प पीडितहरूलाई पहिलो किस्ताको रकम पठाइसकेको तर केही प्राविधिक समस्या हुन गएको बताए । कार्यक्रम स्थलबाटै मेघा बैंकलाई टेलिफोनबाट चौतारा नगरपालिका वडा नं. २ का भूकम्प पीडितहरूलाई तत्तकाल पहिलो किस्ताको राहत उपलब्ध गराउन उनले निर्देशन दिए ।

कार्यक्रममा ४४ जना महिला र ७६ जना पुरूष गरी १ सय २० जनाको उपस्थिति रहेको थियो ।