इन्सेक गतिविधिहरू

शहीद लखन गाउँपालिका-६ घैरूङका भूकम्प पीडितहरूले आफ्ने घर पुर्ण रूपमा भत्किएपनि सरकारी अनुदान पाउनबाट वञ्चित भएको बताएका छन् ।

घैरूङका अधिकांश घर भूकम्पले भत्काएपनि लाभाग्राही सूचीमा आफूहरूको नाम समावेश नभएको भन्दै उनीहरूले चिन्ता व्यक्त गरेका हुन् । मानव अधिकार सञ्जालको आयोजनामा वैशाख १८ गते घैरूङमा आयोजित सार्वजनिक सुनुवाइ कार्यक्रममा सहभागी भूकम्प पीडितले घैरूङका मात्र ४ सय ५३ घरधुरीको नाम लाभाग्राही सूचीमा समावेश नभएको बताए ।

'७ सय ४४ घरधुरीमध्ये ४ सय ५३ घरधुरी लाभाग्री सूचीमा परेनन् ।'-लखन गाउँपालिका-६ का वडा सचिव पुर्णबहादुर गहतराजले भने । पहिलो किस्ताको अनुदान रकम नपाँउदा आफुहरू टहरोमै बस्नुपरेको पीडितको गुनासो छ । 'बाजेको पालादेखि बस्दै आएको घर समेत भूकम्पले लडायो ।'-रामबहादुर श्रेष्ठले भने 'आफूसँगैको छिमेकीले घर ठड्याइसके । हाम्रो पहिलो किस्ता पाउन नामै परेन ।'-कार्यक्रममा सहभागी अधिकांशले आफूहरूको नाम लाभाग्री सूचीमा समावेश नभएको गुनासो पोखे ।

'घर बनाएकाले पनि दोस्रो किस्ताको रकम लिन सकेनौँ ।'-राजकुमार बसेलले भने-'प्राविधको झञ्झटिलो प्रक्रियाले दोस्रो किस्ताको १ लाख ५० हजार रुपियाँ पाउन महिना दिन कुर्नुपरेको छ ।'

त्यस्तै सरकारले उपलब्ध गराएको ३ लाख रुपियाँले घर निर्माण गर्न नपुग्ने पीडितहरूको गुनासो छ । 'यो महङ्गीको जमानामा ३ लाख रुपियाँ दिएर सरकार घर बनाउनुपर्‍यो भन्छ । फेरि घर हामीले सोचेको जस्तो होइन सरकारले भनेको जस्तै बनाउनुपर्‍यो रे !'-रेशम थापाले भने ।

पुनर्निर्माणमा पानीको अभाव भएको पनि भूकम्प पीडितले बताए । '५० हजार रुपियाँ पाए पनि पानी नभएर घर बनाउन सकेनौँ ।'-स्थानीय इश्वर श्रेष्ठले भने-'काठ पनि अभाव छ ।'

राष्ट्रिय पुनर्निर्माण प्राधिकरणका शिव पौडेलले छुट भएका घरधुरीको पुनः सर्वेक्षण हुने बताए । 'अहिले निर्वाचन आचार संहिताले गर्दा टोली गाउँ खटाउन सकेनौँ ।'-पौडेलले भने-'निर्वाचन सकिए लगत्तै प्राविधिक सहितको टोली छुटेका घरधुरीको सर्वेक्षणका लागि आउँछ । त्यति बेला आफैँ बसेर आफ्नो समस्या राख्नुहोला ।' लखन गाउँपालिकाका कार्यकारी अधिकृत युवाराज अधिकारीले धेरै ठाउँमा लालपुर्जा नभएर पीडितले घर बनाउन नसकेको पाइएको बताए ।

हरिराम उप्रेती