इन्सेक गतिविधिहरू

सुनकोशी गाउँपालिकाका भूकम्प पीडितहरूले भूकम्पले क्षति पुर्‍याएका घरको पुनः निरीक्षणका लागि प्राविधिक पठाउन माग गरेका छन् ।

प्राविधिक टोलीले निरीक्षण गरेर पनि क्षति भएका घर लाभग्राहीको सूचीमा नपरेपछि गुनासो फारम भरेका पीडितहरूले अनौपचारिक क्षेत्र सेवा केन्द्र (इन्सेक)ले सुनकोशी गाउँपालिकासँगको सहकार्यमा ०७४ असोज २९ गते सुनकोशी गाउँपालिका वडा नं. ५ को वडा कार्यालयमा आयोजना गरेको भूकम्प पीडितका सवाल सम्बोधनमा स्थानीय तहको भूमिका विषयक सार्वजनिक सुनुवाइमा पीडितहरू गाउँपालिकाले गुनासो भरेका घरको निरीक्षणका लागि प्राविधिक खटाउने व्यवस्था गर्न र पहिलो किस्ता लिएर बनेका घरको दोस्रो किस्ताको रकम चाँडो निकासाको पहल गर्न पनि माग गरेका हुन् ।

भूकम्प पीडित सानु तामाङले आंशिक क्षति भएका घर परिवारका व्यक्तिले गुनासो फारम भरे पनि निरीक्षण नभएको गुनासो गरे । उनले प्राविधिकले घर निर्माणका क्रममा निरीक्षण नगर्दा अनुदान लिएर आवास निर्माण थालेका पीडितहरूले दोस्रो किस्ता नपाउने अवस्था आएको आरोप लगाए ।

प्राविधिककै सल्लाह अनुसार बनाएका घरसमेत प्राविधिक फेरिँदा पीडितले नपाएको अर्का भूकम्प पीडित पञ्चबहादुर तामाङले बताए ।

घर निर्माणका क्रममा भएका समस्या, दोस्रो किस्ता पाउन सिफारिस नभएको र गुनासो सम्बोधन नभएका विषयमा सहभागीहरूले पुनः निर्माण प्राधिकरणका प्राविधिक, गाउँपालिकाका कार्यकारी अधिकृत र वडा अध्यक्षलाई जिज्ञासा राखेका थिए ।

पीडितरूको गुनासा तथा जिज्ञासाको जबाफ प्राविधिक जितेन्द्र शाह, सुनकोसी गाउँ पालिका वडा नं. ५ का वडा अध्यक्ष गोविन्द तामाङ र गाउँपालिकाका कार्यकारी अधिकृत मदन बजगाईले दिएका थिए ।

जबाफ दिने क्रममा बजगाईले गाउँपालिकाले पीडितहरूका सवालहरूलाई पुनः निर्माण प्राधिकरणसम्म पुर्‍याएर सम्बोधन गराउन पहल गर्ने प्रतिबद्धतासमेत जनाएका छन् । त्यस्तै वडा अध्यक्ष तामाङले गाउँपालिकाले गाउँपालिकाभर एक परिवार एक सुरक्षित आवास भन्ने नीति पारित गरेकाले अब सबै पीडितहरूका सवाल सम्बोधन गर्न प्रयास गरिने बताए ।

गाउँपालिकाले भूकम्प पीडितहरूलाई ध्यानमा राखेर अघिल्ला आर्थिक वर्षको मालपोत करसमेत मिनाहा गर्ने निर्णय गरेको कार्यकारी अधिकृत बजगाईले जानकारी गराएका थिए ।

शिवप्रसाद ढुङ्गाना