इन्सेक गतिविधिहरू

अनौपचारिक क्षेत्र सेवा केन्द्र (इन्सेक) मधेश प्रदेश कार्यालयद्वारा गठित मानव अधिकार सहायता कक्षले घरेलु हिंसा पीडित औरही गाउँपालिकाकी ३१ वर्षीया रिङ्कु कुमारी राउतलाई ०८१ पुस २३ गते इन्सेक मधेश प्रदेश कार्यालय जनकपुरधाममा १० हजार रुपियाँ आर्थिक सहयोग प्रदान गरेको छ।

इन्सेक धनुषा प्रतिनिधि सन्तोष कुमार यादवका अनुसार पीडितको अन्तरजातीय प्रेम विवाह सोही गाउँका ३४ वर्षीय राम बटोरी शाहसँग तीन वर्ष अगाडि भएको थियो । प्रेम विवाह भएपनि दाइजो स्वरुप २ लाख रुपियाँ पीडित परिवारले आरोपितलाई दिएको पीडितले बताउनु भयो । ६ महिनाको गर्भवती हुँदा आरोपित पतिले ललाई फकाई औषधि खुवाई गर्भपतन गराएको पीडितले बताउनु भयो । त्यस्तै, थप दाइजो ५ लाख रुपियाँ माग गर्दै आरोपित पति र सासु आमाले पटकपटक कुटपिट गर्नुका साथै खानलाउन नदिएको, विवाहदर्ता तथा नागरिकता नबनाइदिएको र घरमा बस्न समेत नदिएको हुनाले न्यायीक प्रक्रियामा सहजिकरण गरिदिनुहुन आग्रह गर्दै इन्सेक मधेस प्रदेश कार्यालयमा निवेदन दिएको पीडितले बताउनु भयो ।

पीडितको आर्थिक अवस्था कमजोर रहेको हुनाले निजलाई न्यायीक प्रक्रियामा जान सहज हुने उद्देश्यले आर्थिक सहयोग प्रदान गरेको इन्सेक मधेस प्रदेश संयोजक राजु पासवानले बताउनु भयो ।

पीडितले जिल्ला प्रहरी कार्यालय धनुषा अन्तर्गत महिला बालबालिका तथा ज्येष्ठ नागरिक सेवा केन्द्रमा उजुरी दिएको र यस सम्बन्धी पटक पटक छलफल भएपनि कुनै निष्कर्ष आउन नसक्दा पीडितले आरोपित पतिविरुद्ध जिल्ला अदालत धनुसामा अंश सम्बन्धी मुद्दा दर्ता गराएको प्रतिनिधि यादवले जानकारी दिनुभयो ।

सन्तोषकुमार यादव