इन्सेक गतिविधिहरू

तम्घासका आठ सडक बालिकालाई पाठेघरको मुखको क्यान्सर विरुद्धको एचपिभी खोप लगाइएको छ । रेसुङ्गा नगरपालिकाको स्वास्थ्य संयोजक मञ्जु घर्ति मगरका अनुसार जन्मदर्ता नभएका र विद्यालयभन्दा बाहिर रहेको बालिकाहरूलाई खोप लगाइएको हो । रेसुङ्गा नगरपालिका भित्र १३ जना बालिका विद्यालयको पहुँच बाहिर रहेका छन् । जिल्लाभर २ सय ४४ बालिका विद्यालय बाहिर रहेको किशोरीहरूले पाठेघरको मुखको क्यान्सर विरुद्धको एचपिभी खोप लगाउने स्वास्थ्य कार्यालयले जनाएको छ । माघ २२ गतेबाट देशभर खोप अभियान सञ्चालन भएको छ ।

गुल्मीमा विद्यालय बाहिर रहेका रेसुङ्गा नगरपालिकाका १३, मुसिकोट नगरपालिकाका ७४ र चन्द्रकोट गाउँपालिकाका पाँच बालिकालाई खोप लगाइने स्वास्थ्य कार्यालय, गुल्मीका जनस्वास्थ्य अधिकृत पशुपति आचार्यले जानकारी दिनुभयो । त्यस्तै इस्मा गाउँपालिकाका विद्यालय बाहिर रहेका ३५, मदाने गाउँपालिकाका २५, धुर्कोट गाउँपालिकाका ४६, गुल्मीदरबार गाउँपालिकाका पाँच, छत्रकोट गाउँपालिकाका २६ र रुरुक्षेत्र गाउँपालिकाका विद्यालय बाहिर रहेका १५ बालिकाहरूलाई एचपिभी खोप लगाइने आचार्यले बताउनु भयो ।

विद्यालयलाई मात्रै प्राथमिकता दिएर खोप अभियान सञ्चालन हुँदा विद्यालय बाहिर निर्माण स्थल, होटल र घरेलु कामदारको रुपमा रहेका किशोरीहरू छुट्न सक्ने विषयमा इन्सेक लगायतका संस्थाले स्वास्थ्य कार्यालय तथा जिल्ला खोप समन्वय समितिको ध्यानाकर्षण गराएका थिए । साथै खोपका लागि जन्मदर्ता र उमेर खुल्ने सरकारी कागज अनिवार्य गरिएको छ । जसका कारण सडक बालिका, होटल, निर्माणस्थल र घरेलु कामदारको रुपमा रहेका बालिकाहरू स्वर्णीय अवसरबाट छुट्ने सम्भावना छ ।

स्वास्थ्य कार्यालय गुल्मीको प्रमुख वरिष्ठ जनस्वास्थ्य अधिकृत पुष्पा थापाले सामुदायिक र संस्थागत गरेर २ सय १० विद्यालयभन्दा बाहिर रहेका २ सय ४४ किशोरीहरूलाई पनि खोपको पहुँचमा ल्याउने निर्णय भएको बताउनु भयो । उहाँले सदरमुकाम तम्घासमै त्यस्ता किशोरीहरूको सङ्ख्या रहेको र बाहिर स्थानीय तहमा समेत समन्वय गरेर लाभग्राही उमेर समूहलाई खोपबाट वञ्चित नगर्ने प्रतिबद्धता जनाउनुभयो ।

अभियानमा जिल्लाका १२ स्थानीय तहका ११ हजारभन्दा बढी किशोरी बालिकाहरूले पाठेघरको मुखको क्यान्सर विरुद्धको एचपिभी खोप लगाउँदैछन् । कक्षा ६ देखि १० सम्म अध्ययन गर्ने किशोरी र विद्यालय बाहिर भएका १० बर्षदेखि १४ उमेर समूहका किशोरीहरूले खोप पाउने वरिष्ठ जनस्वास्थ्य अधिकृत थापाले बताउनु भयो । जिल्ला खोप समन्वय समिति गुल्मीका संयोजक तथा जिल्ला समन्वय समिति प्रमुख द्रोर्ण बहादुर खत्रीले हरेक स्थानीय तहमा बिगतका अभियानहरू जस्तै एचपिभी खोप पनि अगाडि बढेकाले लाभग्राही किशोरीहरू छुट हुन नहुनेमा जोड दिनुभयो ।

टोपलाल अर्याल