इन्सेक गतिविधिहरू

अनौपचारिक क्षेत्र सेवा केन्द्र (इन्सेक)को आयोजनामा गण्डकी प्रदेशमा बाल अधिकार समूहको प्रदेशस्तरीय सञ्जाल बैठक फागुन ४ गते सम्पन्न भएको छ । बैठकमा बाल अधिकार समूहहरूको कार्यप्रगति समीक्षा गर्दै आगामी योजनाका विषयमा छलफल गरिएको थियो । कार्यक्रममा मादी गाउँपालिका, माछापुच्छ्रे गाउँपालिका र नवलपुरका बाल अधिकार समूहका प्रतिनिधिहरू, बालबालिका, तथा जिल्ला सहजकर्ताहरूको उपस्थिति रहेको थियो ।

बाल अधिकार सञ्जाल गण्डकीका अध्यक्ष सुनिश्चित गुरुङले मादी गाउँपालिकामा विभिन्न चुनौतीका बाबजुद समूहले निरन्तर प्रभावकारी रूपमा काम गरिरहेको बताउनु भयो । समूहले भैलो खेलेर ४० हजार रुपियाँको कोष स्थापना गरेको जानकारी गराउँदै सो रकम सचेतनामूलक कार्यमा लगानी गरिएको उहाँले उल्लेख गर्नु भयो । साथै, समुदायमा सरसफाइका अभियान सञ्चालन गर्दै आएको र आगामी दिनमा अझ व्यापक रूपमा निरन्तरता दिने प्रतिबद्धता व्यक्त गर्नु भयो ।

नवलपुर ज्ञानोदय माविकी छात्रा शितल चौधरीले नवलपुरमा बालविवाहका घटना अझै रोकिएको छैन भन्दै चिन्ता व्यक्त गर्नुभयो । विभिन्न सचेतनामूलक कार्यक्रम सञ्चालन गरिए पनि बालविवाहका घटनाहरू निरन्तर भइरहेको उहाँले बताउनु भयो । जलवायु परिवर्तनको असर पनि नवलपुरमा महसुस हुन थालेको भन्दै विद्यालयस्तरमै नाटकमार्फत सचेतना फैलाइएको जानकारी गराउनुभयो ।

इन्सेक गण्डकी प्रदेश संयोजक शिवप्रसाद खकुरेलले गण्डकी प्रदेशका बाल अधिकार समूहहरूले अन्य बालबालिका, ज्येष्ठ नागरिक, दलित तथा विपन्न समुदायको अधिकार संरक्षणमा समेत सक्रिय भूमिका खेल्नुपर्नेमा जोड दिनु भयो ।

सञ्जय रानाभाट