इन्सेक गतिविधिहरू

पालुङटार नगरपालिका–१ खोप्लाङका भूकम्प पीडितले वर्षाले बाटो बिगार्दा घर निर्माण प्रभावित भएको गुनासो गरेका छन् ।

अनौपचारिक क्षेत्र सेवा केन्द्र (इन्सेक)द्वारा गठित मानव अधिकार सञ्जालको आयोजनामा भएको भूकम्प पीडितको अवस्था विषयक सार्वजनिक कार्यक्रममा सहभागी भूकम्प पीडितले घर निर्माणलाई पुर्णता दिन नसक्दा किस्ता रकम पनि नपाइएको बताए ।

बर्खा आगावै पहिलो र दोस्रो किस्ता लिएर आधाआधी घर निर्माण सकेपनि बर्खाले बाटो बिगार्दा निर्माण सामग्री ल्याउन नपाएर घर निर्माणलाई पुर्णता दिन नसकेको खोप्लाङ ज्योती चौताराकी सरस्वती योगीले बताइन् ।

बर्खाले बिगारको बाटो चाँडो सफा गरेर ट्याक्टर हिँड्न मिल्ने बनाइदिनुपर्ने अधिकांश स्थानीयहरूको माग छ ।

दुई वर्षअघि भूकम्प पीडितको लाभाग्राही सूचीमा नाम समावेश गर्न माग गर्दै गुनासो फर्म भरेपनि हालसम्म त्यसको सुनुवाइ नभएको गोपाल अधिकारीले गुनासो गरे ।

आफू बस्दै आएको दुई वटै घर क्षतिग्रस्त भएर टहरोमा बस्दा पनि लाभाग्राही सूचीमा नाम समावेश नभएको भन्दै उनले असन्तुष्टि जनाए ।

सरकारले सहुलियत दरमा ऋण दिने भनेर आश्वासन दिएपनि भूकम्प पीडितले उक्त ऋण रकम नपाएको लक्ष्मण गुरुङले गुनासो गरे ।

भूकम्प अगावै भिन्न भएर बसेपनि लाभाग्राही सूचीमा नाम समावेश नभएको आइतबहादुर बिकले बताए । टहरोको बसाइ कष्टकर रहेको र अनुदान रकम पाउनबाट आफू वञ्चित रहेको भन्दै लाभाग्राही सूचीमा नाम समावेशको पहल गरिदिन वडा कार्यालय समक्ष उनले माग गरे ।

भूकम्पले क्षतिग्रस्त बनाएको घर रेक्ट्रोफिटिङ गर्न भन्दै पैसा आएकोमा पनि कार्यक्रमका सहभागीले चिन्ता जनाएका थिए । कार्यक्रममा बोल्दै वडा अध्यक्ष कृष्ण परियारले नक्सा पास नगरी तेस्रो किस्ता नपाउने सिस्टम बसालेको बताए ।

पालुङटार नगरपालिकालाई स्माट सिटी बनाउन लागेकाले उक्त अभियानमा स्थानीयहरूको पनि साथ चाहिने उनले बताए । ढुङ्गा माटाका भत्किएका घरलाई लाभाग्राही सूचीमा समावेश गर्न पहल भइरहेको परियारको भनाइ छ ।

पत्रकार महासङ्घ गोरखा शाखाका उपाध्यक्ष दिपक श्रेष्ठले अस्थायी टहरोमा बसेका भूकम्प पीडिको अवस्था भूकम्प गएको तीन वर्षसम्म सुध्रन नसकेको भन्दै चिन्ता जनाए ।

हरिराम उप्रेती