इन्सेक गतिविधिहरू

अनौपचारिक क्षेत्र सेवा केन्द्र (इन्सेक) स्याङ्जाले फेदिखोला गाउँपालिका–२ मा खाद्य अधिकारसम्बन्धी अन्तरक्रिया कार्यक्रम कात्तिक ११ गते सम्पन्न गरेको छ ।

कार्यक्रममा फेदिखोला गाउँपालिकाका कृषि शाखा प्रमुख शिशिर पण्डितले गाउँपालिका भित्रका वडाहरूमा कृषि कार्यक्रम र कृषकहरूको लागि बिनियोजन गरिएको बजेट बारे प्रतिवेदन प्रस्तुत गर्नुभएको थियो ।

उहाँले केही दिन अघि बेमौसमी वर्षाका कारण कृषकहरूले भोग्नु परेको समस्या बारे छलफल गर्दै गाउँपालिकाबाट गरिएका सहयोगको बारेमा जानकारी गराउनु भएको थियो ।

कार्यक्रमका प्रमुख अतिथि फेदिखोला गाउँपालिका–२ का वडाध्यक्ष हिमाल जङ्ग बानियाँले युवाहरूको लागि कृषि क्षेत्रको महत्व बताउदै कृषकलाई प्रोत्साहन गर्न विभिन्न कार्यक्रम ल्याउनुपर्ने बताउनुभयो ।

हाल प्रधानमन्त्री स्वरोजगार कार्यक्रम मार्फत आएको १० लाख रूपियाँ फेदिखोला गाउँपालिका–२ का मजदुरहरूलाई वडाले बिनियोजन गर्ने निर्णय गरेको बताउदै उहाँले सो सहयोगले धेरै मजदुरहरू लाभान्वित हुने र उनीहरूलाई आर्थिक रूपमा सहयोग हुने बताउनुभयो ।

उहाँले मानव अधिकारसम्बन्धी कार्यक्रमकाे लागि वडाले बजेट बिनियाेजन गरेकाे र साे सम्बन्धी कार्यक्रमहरू सञ्चालनमा सहयाेग गरिदिन इन्सेकलाइ अनुराेध गर्नुभयाे ।

कार्यक्रमका सहभागी काजिमान गुरूङले युवा लक्षित योजनाहरू कार्यान्वयन भए नभएको बारे सरोकारवालाले अनुगमन गर्न आवश्यक रहेको बताउनुभयो ।

त्यस्तै कार्यक्रममा  उपस्थित अन्य सहभागीहरूले कृषि बिमाको राहत रकम बुझ्न धेरै समय लाग्ने र सो बारे सेवाग्राहीहरू अझैपनि अनविज्ञ रहेको बताउनुभयो । उहाँहरुले  इन्सेकले सञ्चालन गर्ने यस्ता कार्यक्रम हरेक वडामा गर्नुपर्ने सुझाव दिनुभयाे ।

इन्सेक गण्डकी प्रदेश संयोजक शिव खकुरेलले शिक्षा, स्वास्थ्य, खाद्य र आवासका अधिकार मौलिक अधिकार रहेको र नेपालको संविधानले नागरिकहरूको लागि व्यवस्थापन गरेको अधिकारहरूबाट कोही पनि वञ्चित नहोउन भनीे सो बारे सूचना सम्प्रेषण गरी जागरुकताको आवश्यक रहेको बताउनुभयो ।

कार्यक्रममा इन्सेकद्वारा फेदिखोला गाउँपालिकामा गठन गरिएको मानव अधिकार निगरानी समूहका संयोजक लेखनाथ पराजुलीले इन्सेकद्वारा सञ्चालित कार्यक्रम सूचनामुखि रहेको बताउदै यस्ता कार्यक्रमले नागरिकहरूलाई मानव अधिकार प्रति सम्वेदनशिल  बनाउने बताउनुभयो ।

 

 

तिलकुमारी थापा