इन्सेक गतिविधिहरू

अनौपचारिक क्षेत्र सेवा केन्द्र (इन्सेक) पश्चिमाञ्चल क्षेत्रीय कार्यालय, पोखराको आयोजनामा असार २० गते खाद्य अधिकारका विषयमा पर्वतमा अन्तरक्रिया कार्यक्रम सम्पन्न भएको छ ।

अन्तरक्रिया कार्यक्रममा बोल्दै प्रमुख जिल्ला अधिकारी शम्भुप्रसाद मरासिनीले खाद्यान्न उपलब्धता मात्र नभई उपलब्ध खाद्यन्न किन्न सक्ने क्षमताको विकास नभएसम्म संविधानले व्यवस्था गरे बमोजिमको खाद्य सम्प्रभुताको अधिकार जनताले उपयोग गर्न नसक्ने भन्दै जनताको क्रयशक्ति विस्तारमासमेत ध्यान दिनुपर्ने बताए । उनले सरकार जनताको खाद्य अधिकार सुनिश्चित गर्न प्रतिबद्ध रहेको बताए ।

अन्तरक्रियामा जिल्ला कृषि विकास कार्यालय, पर्वतका वरिष्ठ कृषि विकास अधिकृत बासुदेव रेग्मीले जिल्लामा खाद्य सुरक्षाको अवस्था र त्यसमा जनताको पहुँच विषयमा कार्यपत्र प्रस्तुत गरेका थिए । कार्यपत्रमा जिल्लाको खाद्यान्न सञ्चितिको अवस्था, कृषि उत्पादन र त्यसको वितरण प्रणाली, खाद्यन्नको गुणस्तरलगायतका विषयमा उल्लेख गरिएको छ ।