इन्सेक गतिविधिहरू

अनौपचारिक क्षेत्र सेवा केन्द्र (इन्सेक) क्षेत्रीय कार्यलय, धनगढीको आयोजनामा क्षेत्रीय स्तरमा सञ्चालित कार्यक्रमहरूको वार्षिक समीक्षा असार ३० गते धनगढीमा सम्पन्न भएको छ ।

समीक्षामा इन्सेकका कार्यकारी निर्देशक विजयराज गौतमले इन्सेकले सञ्चालन गरेका विभिन्न क्रियाकलापमा आबद्ध रहेर वर्षभरी कार्य सम्पादन साफलताका साथ गरेको भन्दै क्षेत्रीय कार्यालयमा कार्यरत कर्मचारी, जिल्ला प्रतिनिधि र ग्रामीण तहमा रही कार्य गर्ने सहजकर्तालाई धन्यवाद ज्ञापन गरे ।

गौतमले जिम्मेवार निकायलाई जवाफदेही बनाउने काम जोखीमपूर्णसमेत हुँदाहुँदै पनि सहजै कार्यक्रम सम्पन्न गर्नु भएकोमा धन्यवाद दिँदै आगामी दिनमा समेत प्रभावकारी भूमिका निर्वाह गर्न आग्रह गरे ।

इन्सेक सुदूर पश्चिमाञ्चल क्षेत्रीय कार्यालयका संयोजक खडकराज जोशीले इएलपी कार्यक्रमले जिम्मेवार निकायलाई जवाफदेही बनाएर समाजमा परिवर्तनको लागि थप प्रयास गरेको बताए ।

समीक्षामा कैलाली, कञ्चनपुर र डोटी जिल्लामा कार्यरत सहजकर्ताहरूले वर्षभरी गरेका क्रियाकलापहरूको बारेमा प्रतिवेदन प्रस्तुत गरेका थिए ।