इन्सेक गतिविधिहरू

अनौपचारिक क्षेत्र सेवा केन्द्र (इन्सेक) प्रदेश ५ कार्यालयको आयोजनामा बाल अधिकार चेतना समूहका सदस्यहरूका लागि दुई दिने क्षमता अभिवृद्धि तालिम असोज १६ गते नेपालगञ्जमा सम्पन्न गरिएको छ ।

इन्सेकद्वारा सञ्चालित स्थानीय समुदायलाई सचेत पार्दै जिम्मेवार निकायलाई जबाफदेही बनाउने कार्यक्रम अन्तर्गत बाँके र बर्दिया जिल्लामा सञ्चालित विद्यालयका बाल अधिकार चेतना समूहका सदस्य, संरक्षक शिक्षक, युवा समूहका पदाधिकारीहरूको क्षमता अभिवृद्धिका लागि तालिमको आयोजना गरिएको इन्सेक प्रदेश ५ का संयोजक भोला महतले बताए ।

तालिममा इन्सेक अभियान र मानव अधिकार, बाल अधिकार, नेपालको संविधानमा शिक्षाको अधिकार र बालमनोविज्ञान, बालमैत्री विद्यालय र दण्डरहित शिक्षा, बाल भित्ते पत्रिका प्रकाशन, बाल अधिकार प्रवर्धनमा स्थानीय तहको भूमिका, समस्या पहिचान र आर्थिक कार्ययोजना निर्माणका विषयमा प्रशिक्षण दिइएको कार्यक्रम फोकल पर्सन सरस्वती मल्लले बताइन् ।

तालिममा अधिवक्ता सुनिल श्रेष्ठ, पत्रकार ठाकुरसिंह थारू, इन्सेकका संयोजक भोला महत, कार्यक्रम फोकल पर्सन सरस्वती मल्ल, नगर शिक्षा शाखाका गोर्खबहादुर थापालगायतले सहजिकरण गरेको फोकल पर्सन मल्लले बताइन् ।

तालिममा बाँके, बर्दियाका बाल अधिकार चेतना समूह, संरक्षक शिक्षक, युवा समूहका गरी ५० जनाको सहभागिता रहेको थियो ।

इन्सेक प्रदेश ५ कार्यालय, नेपालगञ्ज