इन्सेक गतिविधिहरू

इन्सेकद्वारा सञ्चालित स्थानीय समुदायलाई सचेत पार्दै जिम्मेवार निकायलाई जबाफदेही बनाउने इएलपी कार्यक्रम अन्तर्गत परियोजना सल्लाहकार समितिसँग कार्यक्रमको प्रभावकारिता विषयक समीक्षा कार्यक्रम असार ५ गते घोराहीमा सम्पन्न भएको छ ।

कार्यक्रममा जिल्लामा इन्सेकद्वारा सञ्चालित इएलपी परियोजनाअन्तर्गत शिक्षा, स्वास्थ्य र खाद्य अधिकारका लागि गरिएका गतिविधिहरूको समीक्षा गरिएको थियो । इएलपी कार्यक्रमको प्रभावकारिताको समीक्षा गर्दै आगामी दिनमा थप प्रभावकारी क्रियाकलापका लागि लाग्न सहभागीहरूले सुझाव दिएका थिए ।

परियोजना सल्लाहकार समितिका संयोजक जिल्ला समन्वय समितिका गैसस समन्वय शाखा अधिकृत डा. गोविन्द आचार्यको अध्यक्षतामा सम्पन्न कार्यक्रममा इएलपी कार्यक्रम अन्तर्गत चालु आर्थिक वर्षमा गरिएका कार्यक्रमको जानकारी गराइएको थियो ।

जिल्ला कार्यक्रम सहजकर्ता शालिकराम मुसाफिरले मानव अधिकार निगरानी समूह, बाल अधिकार चेतना समूह र युवा समूह तथा जिल्लास्तरमा गरिएका गतिविधि र त्यसका उपलब्धिका विषयमा सल्लाहकार समितिलाई जानकारी गराएका थिए ।

सो अवसरमा सेवाप्रदायक निकायहरू जिल्ला कृषि विकास, जिल्ला जनस्वास्थ्य, जिल्ला पशुसेवा कार्यालय, जिल्ला समन्वय समितिलगायतका प्रमुख तथा प्रतिनिधिहरूले शिक्षा, स्वास्थ्य र खाद्य अधिकारका लागि निगरानी गर्ने र सेवा प्रदायक निकायलाई जबाफदेही बनाउने कार्यलाई अझ तीव्रता दिन सुझाव दिए ।

उनीहरूले इन्सेकले शिक्षा, स्वास्थ्य र खाद्य अधिकारमात्र नभई क्षेत्र र विषयलाई पनि आगामी दिनमा विस्तार गर्न आग्रह गरेका थिए ।

जेएन सागर