इन्सेक गतिविधिहरू

आर्थिक अवस्था कमजोर भइ कानुनी प्रक्रियामा जान नसकेकी दैलेख गुराँस गाउँपालिका–५, गोगनपानी स्थायी घर भइ हाल वीरेन्द्रनगर नगरपालिका–६, शनिहल लाइनमा बस्दै आउनुभएकी ४२ वर्षीया टिका दमाइलाई ०८१ असोज २ गते इन्सेक कर्णाली प्रदेश कार्यालय, सुर्खेतले कानुनी प्रक्रियामा जानका लागि आर्थिक सहयोग गरेको छ ।

४२ वर्षीय पति कमल दमाईले ०८१ वैशाख १ गते मदिरा सेवन गरेर इट्टा र दाउराले मरणसन्न हुनेगरी कुटपिट गरेको र विगत पाँच वर्षदेखि शारीरिक र मानसिक यातना दिँदै आएको पीडितले बताउनु भयो । पीडितले हिंसा गर्न थालेपछि पतिसँगको सम्बन्ध विच्छेद र घरेलु हिंसा विरुद्ध जिल्ला अदालत सुर्खेतमा ०८१ जेठ ११ गते मुद्दा दायर गर्नुभएको छ । अदालतमा मुद्दाको लागि आवतजावतमा समस्या भएको भन्दै पीडितले आर्थिक समस्या र कानुनी प्रक्रियामा जानका लागि कानुनी शुल्कमा समस्या भएपछि पीडितले आर्थिक सहयोगको माग गर्दै इन्सेकमा भदौ १३ गते निवेदन दिनुभएको थियो ।

पीडितको निवेदनको आधारमा मानव अधिकार सहायता कक्षको ०८१ भदौ २५ गते बसेको बैठकको निर्णय अनुसार नगद ९ हजार रुपियाँ आर्थिक सहयोग गरेको इन्सेकका कर्णाली प्रदेश संयोजक नारायण सुवेदीले जानकारी दिनुभयो । पीडितलाई न्यायिक प्रक्रियामा जाँदा लाग्ने निवेदन शुल्क, फोटोकपी र यात्रा खर्च लगायतका शीर्षकमा सहयोग पुग्ने उद्देश्यले उक्त रकम सहयोग गरिएको संयोजक सुवेदीको भनाइ छ ।

जगतदल जनाला विक