इन्सेक गतिविधिहरू

अनौपचारिक क्षेत्र सेवा केन्द्र (इन्सेक) का व्यवस्थापन विभाग प्रमुख पे्रमप्रसाद पराजुलीसहितको अधिकारकर्मीको टोलीले भदौ २७ गते सुर्खेत कारागारको अनुगमन गरेको छ ।

अनुगमनको क्रममा टोलीले लामो समयदेखि कष्टपूर्ण जीवनयापन गरिरहेका कैदीबन्दीहरूले भोग्नु परेको समस्याका बारेमा उनीहरूसँग प्रत्यक्ष रूपमा छलफल समेत गरेको छ । छलफलमा एकै स्थानमा कोचिएर बस्नुपर्दा खानेपानी, शौचालय, मौसम अनुसार लाग्ने रोग, खानेबस्ने तथा सुत्ने समस्याबाट आफूहरू प्रताडित हुनुपरेको कैदीबन्दीले बताएका थिए ।

कारागार अनुगमनको क्रममा आउने कारागार प्रशासन, सांसददेखि सरकारका मन्त्रीलाई समेत आफूहरूले भोग्दै आएको समस्याहरूको बारेमा अवगत गराएपनि समाधानको लागि पहलकदमी नभएको कारागारका नाइके शम्भु रोकायले बताए ।

०२९ सालमा निर्मित कारागारमा अहिले क्षमता भन्दा चार दोब्बर बढी कैदीबन्दी राखिएको छ । कारागारमा महिलाका लागि एक र पुरुषतर्फ चार वटा मात्र शौचालय छन् ।

५० जना क्षमता रहेको सुर्खेत कारागारमा हाल १ सय ९९ जना पुरुष र २३ जना महिला तथा एक जना आश्रित नाबालिका छन् । दश वर्ष अघि निर्माण सुरू गरिएको १ सय जनाको क्षमता भएको सुधार गृह विगत आठ वर्षदेखि निर्माण कार्य ठप्प रहेको छ ।

टोलीले सुर्खेतका प्रमुख जिल्ला अधिकारी वीरेन्द्रकुमार यादव र जिल्ला प्रहरी कार्यालयका एसपी बसन्त रजौरेसँग भेटघाट गरी जिल्लाको मानव अधिकारको अवस्थाका विषयमा जानकारी लिएको थियो ।

भेटघाटका क्रममा प्रजिअ यादवले मानव अधिकारको क्षेत्रमा काम गर्ने आधिकारिक संस्थाका रूपमा इन्सेकलाई हेर्ने गरिएको बताए । प्रजिअ यादवले इन्सेक मानव अधिकारको पर्यायवाची बनेकोसमेत बताए ।

एसपी रजौरेले सुरूसुरूमा प्रहरीलाई अधिकारकर्मीसँग बोल्नु हुदैन भन्ने जस्तो लाग्थ्यो अहिले सँगै काम गर्नुपर्छ भन्ने बुझाइ भएको बताए ।

अनुगमन टोलीले प्रदेशस्थित अर्थ मन्त्रालयका सचिव ढुण्डीराज निरौलासँग पनि भेट गरेको थियो । भेटका क्रममा सचिव निरौलाले कर्णाली प्रदेशको विकासको अवस्थाका विषयमा जानकारी गराएका थिए ।

दुर्गा थापा