इन्सेक गतिविधिहरू

अनौपचारिक क्षेत्र सेवा केन्द्र (इन्सेक)को पोखरा कार्यालयको टोलीले जिल्ला कारागार बागलुङको अनुगमन गरेको छ ।

इन्सेक पोखरा कार्यालयका संयोजक शिव खकुरेल, प्रलेख अधिकृत सुमित्रा भट्टराई र बागलुङ जिल्ला प्रतिनिधि सिर्जना पन्तको टोलीले जेठ १४ गते कारागारको अनुगमन गरेको हो ।

अनुगमनको क्रममा कारागारका चौकिदार सुर्य नेपालीले २५ जना क्षमता भएको कारागारमा ९३ जना कैदी बन्दीहरू बस्नुपर्दा निकै समस्या हुने गरेको बताए । कैदीबन्दीहरूलाई नेपाल सरकारले नेपाल खाद्य संस्थानमार्फत दैनिक ७ सय ग्राम चामल तथा अन्य खाद्यान्न र प्रतिदिन ४५ रुपियाँ नगद उपलब्ध गराउँदै आएको भए पनि व्यवस्थापन गर्न गाह्रो भएको नेपालीले बताए । बर्खा सुरू भएसँगै धारोबाट फोहोर लेदो पानी आउने भएकाले खानेपानीको समस्या सुरू भएको उनको भनाई छ ।

उनले कारागारको कैदीबन्दी क्षमता अनुसार स्वास्थ्य उपचार र औषधि खर्च प्राप्त हुने भन्दै सामान्य उपचार पनि आफ्नो खर्चमा गर्नुपरेको बताएका छन् । संयोजक खकुरेलसँग कैदीबन्दीहरूले इन्सेकले प्रकाशन गर्दै आएका प्रकाशनहरू उपलब्ध गराइदिन माग गरेका छन् ।

अनुगमनको क्रममा खकुरेले कैदी बन्दीहरूलाई उनीहरूले प्राप्त गर्न सक्ने अधिकार र कर्तव्यको बारेका जानकारी गराएका थिए । सो टोलीले बागलुङ जिल्लाका प्रमुख जिल्ला अधिकारी बेदप्रसाद खरेल र एसपी दिपक रेग्मीसँग पनि भेटघाट गरेको छ । भेटमा बागलुङ जिल्लाको शान्ति सुरक्षा र मानव अधिकारको अवस्था बारेमा छलफल भएको थियो ।

सिर्जना पन्त