इन्सेक गतिविधिहरू

अनौपचारिक क्षेत्र सेवा केन्द्र (इन्सेक) क्षेत्रीय कार्यालय काठमाडौँ अन्तर्गतका ६ जिल्लामा सञ्चालित स्थानीय समुदयालाई सचेत पार्दै जिम्मेवार निकायलाई जबाफदेही बनाउन पहल (इएलपी) कार्यक्रमको वार्षिक समीक्षा बैठक जेठ २६ गते काठमाडौँमा सम्पन्न भएको छ ।

बैठकमा इन्सेक केन्द्रीय कार्यालयका अर्थ तथा व्यवस्थापन प्रमुख प्रेम पराजुलीले इन्सेकको नीति नियम तथा आर्थिक व्यस्थापनसम्बन्धी जानकारी गराएका थिए ।

सरकारले शिक्षा, स्वास्थ्य र खाद्य अधिकारका लागि वार्षिक रूपमा बनाएको योजना स्थानीय स्तरमा लागु भए नभएको विषयमा निगरानी गर्न र गराउन सहजकर्ताहरूले महत्वपूर्ण भूमिका निर्वाह गर्न उनले सुझाव दिए ।

शिक्षा, स्वास्थ्य र खाद्य अधिकारका सवालहरूको पहिचान गर्न जिल्लामा गठित मानव अधिकार निगरानी समूहका पदाधिकारीहरूलाई सिकाउन र सरोकारवाला निकायमार्फत ती अधिकार पुरा गराउन सकिए मात्र यो कार्यक्रमको सार्थकता पूरा हुने उनले बताए ।

इन्सेक क्षेत्रीय कार्यालय काठमाडौँका संयोजक कृष्ण गौतमले इएलपी कार्यक्रम जनताको प्रत्यक्ष सरोकारका विषयसँग सम्बन्धित रहेकोले राज्यले सुनिश्चित गरेका शिक्षा, स्वास्थ्य र खाद्य अधिकारको खोजी गर्दै सेवा प्रदायक निकायलाई त्यसप्रति जबाफदेही बनाउने कार्यमा लाग्न सहजकर्ताहरूलाई सुझाव दिए ।

कार्यक्रममा इएलपी कार्यक्रम सञ्चालित धनुषा, बारा, पर्सा, धादिङ, सिन्धुपाल्चोक र दोलखा जिल्लाका सहजकर्ताहरूले कार्यक्रमको प्रगति तथा उलब्धिका बारेमा प्रस्तुती गरेका थिए ।

इन्सेक क्षेत्रीय कार्यालय काठमाडौँ