इन्सेक गतिविधिहरू

"महिलामा लगानी : सम्य र समुन्नत समाजको थालनी" भन्ने मुल नाराका साथ १ सय १४ औँ आन्तर्राष्ट्रिय महिला दिवसको अवसरमा बटेश्वर गाउँपालिकामा ०८० फागुन २५ गते विहान प्रभातफेरीको आयोजना गरिएको छ ।

अनौपचारिक क्षेत्र सेवा केन्द्र (इन्सेक), मानव अधिकार समूह, नव दुर्गा महिला कृषि सहकारी संस्था लि. बटेश्वर र युएनडिपीको संयुक्त आयोजनामा बटेश्वर गाउँपालिकाको ग्रामिण वस्तीहरुमा उक्त प्रभातफेरीको आयोजना गरिएको हो ।

प्रभातफेरीमा सहभागिहरुले महिलामाथि हुने हिंसाको अन्त्य गरौँ र दाइजो, बालविवाह बन्द गरौँ लगायतका नारा सहित सचेतना मुलक सन्देश प्रवाह गरेका थिए ।

उक्त प्रभातफेरी गाउँपालिका कार्यालयमा आएर कोण सभामा परिणत भएको थियो । कोण सभालाई सम्बोधन गर्दै बटेश्वर गाउँपालिकाका उपाध्यक्ष फुलकुमारी सिंहले महिला कमजोर नरहेको र महिला जागरुक भएकोले आफ्नो अधिकारका लागि महिलाहरुले आवाज उठाउनु पर्नेमा जोड दिनु भयो । महिला र पुरुषमा समान अधिकार आवश्यक रहेको उहाँले उल्लेख गर्नु हुँदै महिलामाथि हुने हिंसा तथा समाजमा विद्यमान हानिकारक प्रथाहरुको अन्त्यका लागि प्रभावकारी रुपमा कानुन कार्यान्यवन हुनु पर्ने बताउनु भयो ।

इन्सेक मधेश प्रदेश संयोजक राजु पासवानले महिलामाथि विभेद र असमानता कायम रहेकोले महिला मैत्री एने, कानुन, नीति तथा कार्यक्रम आवश्यक रहेको बताउनु भयो । महिलामाथिको हिंसा मधेश प्रदेशमा बढेर गएकोले कानुनको प्रभावकारी कार्यान्वयन र जनचेतनामूलक कार्यक्रम आवश्यक रहेको उहाँले बताउनु भयो ।

बटेश्वर गाउँपालिकाका मानव अधिकार समूहका उपाध्यष लक्ष्मी कुमारी महतोले महिलाहरुको हक अधिकार संरक्षण होस् भनि यो दिवसले सन्देश दिएको बताउनु भयो । महिलालाई घरमै सिमित राख्ने गरिएका कारण अधिकार मागेर होइन लडेर लिनु पर्नेमा उहाँले जोड दिनु भयो ।

नव दुर्गा महिला कृषि सहकारी संस्था लि. बटेश्वरका अध्यक्ष बालकुमारी थापले छोरा छोरीमा विभेद नगरी शिक्षा दिनु पर्नेमा उहाँले जोड दिनु भयो ।

सन्तोष कुमार यादव