इन्सेक गतिविधिहरू

अनौपचारिक क्षेत्र सेवा केन्द्र (इन्सेक) ले डब्लुपीडी नेपालको सहयाेगमा हेटौँडामा सञ्चालित मानव अधिकार र महिला सशक्तिकरण कार्यक्रमको कार्यशाला गोष्ठी ०८० असोज १३ गते सम्पन्न भएको छ ।

महिला समूह गठन गरी समूहमार्फत महिलाहरूको अधिकार सहित आर्थिक सशक्तीकरणको लागि समाजमा सचेतना बढाउने काम भएको इन्सेक बागमती प्रदेश संयोजक गणेश भण्डारीले बताउनु भयो । उहाँले सङ्घसंस्थाको कामलाई स्थानीय सरकारले अपनत्व लिएको कारण पनि कार्यक्रम सफल भएको बताउनु भयो । महिला सशक्तीकरण र आर्थिक सामाजिक  अधिकारको क्षेत्रमा इन्सेकले स्थानीय तहमा काम गर्दै आएको संयोजक भण्डारीले बताउनु भयो ।

कार्यक्रममा प्रमुख अतिथी हेटौँडा उपमहानगरपालिका-१९ का वडा अध्यक्ष नरनाथ सुवेदीले अहिलेको स्थानीय तहमा देखिएको महिला सहभागिता इन्सेक लगायतका सङ्घसंस्थाको अभियानको उपलब्धि रहेको बताउनु भयो । तीन वर्षको अभियानमा समूह मोटिभेटर तथा सहजकर्ताहरूले आगामी दिनमा समाजहमा पुगेर अभियानलाई सार्थकता दिलाउन सन् २०२० बाट सञ्चालित परियोजना प्रभावकारी भएको उहाँले बताउनु भयो ।

मनहरी गाउँपालिका-४ का वडाअध्यक्ष प्रकाश थापाले परियोजनाले महिलाहरूमा अधिकारसहितको आर्थिक विकासमा परिवर्तन ल्याएको बताउनु भयो । उहाँले इन्सेक र डब्लुपीडीलाई उक्त कार्यक्रम सञ्चालन गरेकोमा धन्यवाद दिनुभयो ।

मनहरी गाउँपालिका-१ का वडाअध्यक्ष शिवप्रसाद खनालले डब्लुपीडीको आर्थिक सहयोगमा इन्सेकले यो तीन वर्षमा गरेको कार्यक्रमले महिला दिदिबहिनीहरूमा परिवर्तन देखिएको बताउनु भयो । परियोजनाको समयपछि यो अभियानलाई पालिकाले अपनत्व लिएर अघि बढ्ने प्रतिबद्ध व्यक्त गर्नुभयो ।

राष्ट्रिय मानव अधिकार आयोग बागमती प्रदेशका प्रशासन अधिकृत लोकनाथ घिमिरेले परियोजनापछि सिकेका अधिकार प्राप्तिको प्रक्रिया, ज्ञान र सिपलाई स्थानीय स्रोत साधनलाई प्रयोग गरी जीवन उपयोगी बनाउने कार्यमा प्रयोग गर्न सुझाव दिनुभयो ।

सामाजिक विकास शाखा मनहरीका ज्ञानेन्द्र ढकालले समाजमा भएका समस्यालाई स्थानीय तहसम्म ल्याइपुर्‍याउन परियोजनाले सहयोग पुगेको बताउनु भयो । यसले गर्दा स्थानीय तहले आफ्ना नीति तथा कार्यक्रममा समावेश गरी महिला आर्थिक सशक्तीकरण, आयअर्जन हुने र महिला हिंसा जास्ता समस्याहरू न्यूनीकरण गर्ने बताउनु भयो ।

उहाँले आगामी वर्षमा मनहरीको सबै वडाहरूमा परियोजना लैजान र दुरदराजका महिला बालबालिकाको आवाजलाई समेट्न आग्रह गर्नुभयो ।

मानव अधिकार समूह संयोजक बिमला गोपालीले परियोजनाको तीन वर्षमा मनहरीमा महिलाको क्षेत्रमा परियोजनाले उल्लेख्य योगदान पुर्‍याएको अनुभुति भएको बताउनु भयो । आगामी दिनमा स्थानीय तहबाट यस्ता परियोजना जस्तै कार्यक्रम लागु गर्न आग्रह गर्नुभयो ।

डब्लुपीडी नेपालकी फिल्ड सुपरभाइजर तिलकुमारी हुमागाईले मनहरी गाउँपालिकाको वडा नम्बर १, ३, ४ र हेटौँडा उपमहानगरपालिका-१९ मा डब्लुपीडीको आर्थिक सहयोगमा इन्सेकले मानव अधिकार र सशक्तिकरणमा कार्यक्रम सञ्चालन गरेको बताउनु भयो ।

सन् २०२० बाट सुरु  महिलाहरूको अधिकार सहित आर्थिक सशक्तीकरणको लागि समाजमा सचेतना बढाउने काम भएको इन्सेक कार्यक्रम संयोजक कृष्ण नेपालले बताउनु भयो ।

पुष्पराज अधिकारी