प्रेस विज्ञप्तिहरू

 

कान्तिपुर दैनिकका प्रकाशक कैलाश सिरोहियालाई उक्त दैनिकको थापाथलीस्थित कार्यालयबाट गिरफ्तार गरी रातारात स्थलमार्गबाट जनकपुरतर्फ लगिँदै गरेको घटना आवरणमा जे भनिए पनि आमसञ्चार माध्यमलाई निर्भीक बन्नबाट रोक्ने नियोजित प्रयास हो भन्ने देखिन्छ । नागरिकता छानविनका लागि गिरफ्तार गरिएको भनिए पनि प्रतिष्ठित सञ्चार माध्यमका प्रकाशकलाई त्यसअघि कुनै सोधपुछ नगरी यस्तो बेला गिरफ्तार गरिएको छ, जतिबेला गृहमन्त्रीको सहकारीसँगको विवादास्पद संलग्नताका सम्बन्धमा कान्तिपुर मिडिया ग्रुपले श्रृङ्खलाबद्ध रुपमा आलोचनात्मक सामग्री प्रकाशित वा प्रसारित गर्दै आएको छ ।

तसर्थः नेपाली इतिहासका विभिन्न कालखण्डमा लोकतन्त्रभित्रैबाट अधिनायकवादी अभ्यासको दुष्प्रयास हुने गरेको पृष्ठभूमिमा हामी मिडिया उद्यमी सिरोहियाको गिरफ्तारी, उहाँमाथि लागेको नागरिकतासम्बन्धी आरोपका कारणले नभई प्रतिशोधका आधारमा भएको होइन भन्ने देख्दैनौं । एक प्रमुख स्वतन्त्र मिडियाप्रति सरकारको यो व्यवहारको प्रतिकूल असर देशका आमसञ्चारमा पर्दैन भन्न सकिँदैन ।

यसर्थः हामी लोकतान्त्रिक परिधि खुम्च्याउन र खासगरी प्रेस तथा अभिव्यक्ति स्वतन्त्रता कुनै पनि बहानामा संकुचन गर्ने दुष्प्रयास नगरिने सुनिश्चित गर्न सरकारलाई सचेत गराउँदछौँ ।

 

डा. कुन्दन अर्याल

अध्यक्ष