जनवरी २०२३ देखि हिजोसम्म नेपालमा ३ सय ४९ बालिका तथा महिला हिंसाबाट पीडित

 

सन्दर्भः ११३ औँ अन्तर्राष्ट्रिय महिला दिवस

१ सय १३ औँ अन्तर्राष्ट्रिय महिला दिवसका अवसरमा सम्पूर्ण आमा, दिदी, बहिनीमा हार्दिक शुभकामना व्यक्त गर्दछौँ । यस अवसरमा हामी महिला तथा बालिकामाथि हुने कुनै पनि किसिमको हिंसा विरुद्ध शून्य सहनशीलता दर्शाउन सम्बन्धित सबैलाई आह्वान गर्दछौँ ।

संयुक्त राष्ट्रसङ्घले जारी गरेको महिला विरूद्ध हुने सबै प्रकारका भेदभाव उन्मुलनसम्बन्धी अन्तर्राष्ट्रिय महासन्धि–१९७९ को पक्ष राष्ट्र नेपालका महिलाहरूले हिंसाको शिकार हुन नपरोस् र महिला मानव अधिकारको संरक्षण र सम्बर्द्धनमा राज्यका सबै निकाय संवेदनशील बन्न सकुन् । हामी नेपाली बालिका र महिलाले संवैधानिक हकको उपभोग गर्दै मानव अधिकारहरूको विश्वव्यापी मान्यताअनुरुप सुरक्षित जीवन यापन गर्न पाउनु पर्छ भन्ने दोहोर्‍याउन चाहन्छौँ ।

इन्सेकले देशभरिबाट सङ्कलित तथ्याङ्कका आधारमा गरेको अभिलेख अनुसार सन् २०२३ को जनवरीदेखि हिजो मार्च ७ सम्म बालिका र महिला गरी ३ सय ४९ जना पीडित भए । जसमध्ये १ सय १ जना बालिका र २ सय ४८ जना महिला थिए । अभिलेखित घटना अनुसार बालविवाहका घटनामा पाँच जना, बेचबिखन तथा ओसारपसारका घटनामा तीन जना, बलात्कारका घटनामा ७४ जना र यौन दुर्व्यवहारका घटनामा १९ जना बालिका पीडित भए ।

सन् २०२३ को यो अवधिमा घरेलु हिंसामा परी १ सय ९३ जना महिला पीडित भए । बहुविवाहका घटनामा १३ जना, बलात्कार प्रयासका घटनामा सात जना, यौन दुर्व्यवहारका घटनामा दुई जना, बलात्कारका घटनामा ३० जना र बेचबिखन तथा ओसारपसारका घटनामा तीन जना महिला पीडित भएका घटना अभिलेख गरिएको छ ।

नेपालको संविधान २०७२ को धारा ३८ को उपधारा ३० ले प्रत्येक महिलालाई धार्मिक, सामाजिक, सांस्कृतिक, परम्परा, प्रचलन वा अन्य कुनै पनि आधारमा शारीरिक, मानसिक, यौनजन्य, मनोवैज्ञानिक वा अन्य कुनै किसिमका हिंसाजन्य कार्य वा शोषण विरुद्धको हक सुनिश्चित गरेको छ । तर, अन्धविश्वास, परम्परागत सामाजिक संरचना, कानुन कार्यान्वयनको अभाव र राज्यका विभिन्न निकायको लैङ्गिक जबाफदेहिताको कमजोर अवस्थाका कारणले महिला हिंसाका घटनामा कमी आएको छैन ।

Kundan aryal sign

डा. कुन्दन अर्याल

अध्यक्ष