समाचारहरू

१६ वर्षीया बालिकालाई बलात्कार गरेको कसुरमा जिल्ला अदालतले ताप्लेजुङ जिल्ला, याङवरक गाउँपालिका–५ का २० वर्षीय सचिन भनिने सचिन्द्र सेनेहाङलाई १२ वर्ष कैद सजायको फैसला गरेको छ ।

जिल्ला अदालतका न्यायाधीश टेकेन्द्र दाहालको ०८० वैशाख १७ गतेको इजलासले कसुर गरेको ठहर गर्दै पीडितले पाउने गरी कसुरदारबाट १ लाख रुपियाँ क्षतिपूर्ति भराउन आदेश भएको अदालतका श्रेस्तेदार विश्वजङ्ग सिञ्जापतिले बताउनु भयो ।

पीडित बालिकालाई आरोपितले ०७८ चैत २ गते बलात्कार गरेको आरोपमा पीडित पक्षले आरोपितविरुद्ध ०७८ चैत १० गते जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले ०७८ चैत १० गते घरबाट गिरफ्तार गरी चैत २८ गते जिल्ला अदालतमा बलात्कार शीर्षकमा मुद्दा दर्ता गरी कारबाही अघि बढाएको थियो ।

जिल्ला अदालतका तत्कालीन न्यायाधीश योगेन्द्रप्रसाद शाहको चैत २९ गतेको आदेशले आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण जिल्ला अस्पतालमा चैत १० गते गरिएको थियो ।

सहमान विश्वकर्मा