सहपाठीको कुटपिटबाट घाइते बालकको उपचारका क्रममा मृत्यु

पोखरा महानगरपालिका–१३ स्थित एक विद्यालयमा कक्षा ५ मा पढ्ने विद्यार्थीबिच एक आपसमा झगडा हुँदा १५ वर्षीय होमबहादुर बिकको मृत्यु भएको छ ।

माघ २० गते नियमित कक्षा सकिएपछि ४ बजे होमबहादुरलाई १५ वर्षीय सहपाठीले शौचालय गएका बेला गालाको थप्पड हानेको आरोप छ । गालामा पूरानो घाउ भएका होमबहादुर सोही दिनदेखि बेहोस थिए ।

मणिपाल अस्पतालको इमर्जेन्सीमा भर्ना गरेर उनको शल्यक्रिया गरिएको थियो । पिटाइबाट घाइते भएका होमबहादुरको उपचारकै क्रममा माघ २५ गते निधन भएको हो ।

उनको अप्रेशन गरेका डा. कृष्ण कोइरालाले पहिल्यैदेखि स्वास्थ्य समस्या रहेकाले सोचेजति स्वास्थ्यमा प्रगति नभएको र ब्रेन डेथ भइसकेको बताए ।

जिल्ला प्रहरी कार्यलय कास्कीका डिएसपी रविन्द्रमान गुरुङले घटना भए लगत्तै आरोपित बालकलाई गिरफ्तार गरी अनुसन्धान अगाडि बढाइएको बताए ।


सुशन घिमिरे