समाचारहरू

दुई कक्षामा अध्ययनरत ६ वर्षीय सञ्जय बिकलाई उनी अध्ययनरत नमूना प्राथमिक विद्यालय, बोवाङकी प्रधानाध्यापक ४२ वर्षीया हिरादेवी बुढामगरले कुटपिट गरेको भन्दै ढोरपाटन नपा–८ बोबाङकी १८ वर्षीया जानमाला बिक सदरमुकाम पुगेकी छिन् ।

विद्यालयमा पढ्न गएका भाइ सञ्जयलाई माघ २० गते प्रधानाध्यापक बुढामगरले १ सय रुपियाँ दिई आफ्नो लागि रिचार्ज कार्ड किन्न पठाएकोमा सञ्जयले पैसा हराएपछि सोही निहुँमा भाइलाई कुटपिट गरेको जानमालाको भनाई छ ।

हराएको पैसा आमा आएपछि मागेर दिन्छौँ भाइलाई नकुट्नुस् भन्दा प्रधानाध्यापक बुढामगरले आफूलाई पनि कुटपिट गरेको जानमालाले बताईन् ।

आफुहरूमाथि कुटपिट गरेको भन्दै पीडित पक्षले सोही दिन प्रहरीमा जानकारी गराएको र वडा कार्यालयको सल्लाह अनुसार माघ २१ गते ढोरपाटन प्रहरी चौकीमा लिखित उजुरी समेत दिएको भएपनि प्रहरीले आफ्नो उजुरी माथि चासो नदेखाएको जानमालाले आरोप लगाइन् ।

ढोरपाटन प्रहरी चौकीका असई कृष्ण चुणली क्षेत्रीले ठाडो उजुरी परेको भएपनि आरोपित नहुँदा छलफल अगाडि बढाउन नसकेको बताए ।

अभिभावक तथा स्थानीयले विरोध गरेपछि प्रधानाध्यापक बुढामगरले उल्टै आफूमाथि अभद्र व्यवहार गरेको भन्दै माघ २३ गते जिल्ला प्रहरी कार्यालय, बागलुङमा बिक परिवारको विरूद्धमा उजुरी दिएकी छिन् ।

उजुुरीपछि जिल्ला प्रहरी कार्यालय, बागलुङले पीडित सञ्जयका हजुरबुबा चन्द्र, हजुरआमा काली र आमा आसमायालाई जिल्ला झिकाएको छ ।

आर्थिक अवस्था कमजोर रहेका बिकको परिवारलाई २४ गते ढोरपाटन नगरपालिकाले १० हजार रुपिँया बाटोखर्च उपलब्ध गराएर सदरमुकाम पठाएको ढोरपाटन नगरपालिकाका मेयर देवकुमार नेपालीले बताए ।

जिल्ला प्रहरी कार्यालय, बागलुङका एसपी दिपक रेग्मीले पीडित विद्यार्थीको परिवारले ढोरपाटन प्रहरी चौकीमा उजुरी दिएको कुरामा सुन्नमा आएपनि विस्तृत जानकारी नआएको र प्रधानाध्यापक बुढामगरले आफूमाथि अभद्र ब्यवहार गरेको भन्दै प्रहरीमा उजुरी दिएपछि छलफलका लागि बिकको परिवारलाई सदरमुकाम झिकाइएको बताए ।

तर, माघ २५ गते जिल्ला प्रहरी कार्यालयमा भएको छलफलका क्रममा प्रधानाध्यापकले विद्यार्थी र विद्यार्थीको परिवारलाई अभद्र ब्यवहार गरेको देखिएको बताए । रेग्मीले दुवै पक्षबीच छलफल चलाएको घटनाको यथार्थता बुझी पीडितलाई न्याय दिलाउने प्रतिबद्धता ब्यक्त गरे ।

सिर्जना पन्त