छाउगोठमा बसेकी बालिकालाई सामूहिक बलात्कार, आरोपितविरूद्ध प्रहरीमा उजुरी

  ०७५ असार २१ गते

छाउगोठमा बसेकी १५ वर्षीया बालिकालाई सामूहिक बलात्कार गरेको आरोपमा पीडित पक्षले आरोपितविरूद्ध असार २० गते इलाका प्रहरी कार्यालय बावियाचौरमा उजुरी दर्ता गरिएको छ ।

छाउगोठ बसेकी पीडितलाई असार १८ गते राति बराहताल गाँउपालिका-६ का १८ वर्षीय जनक शर्मा, १५ वर्षीय र १४ वर्षीय बालकसमेतले बलात्कार गरेको भन्दै पीडित पक्षले असार १९ गते इलाका प्रहरी कार्यालय बावियाचौरमा उजुरी दिएको हो ।

आरोपित तीनैजनालाई प्रहरीले असार १९ गते गिरफ्तार गरेको इलाका प्रहरी कार्यालय बावियाचौरका इन्स्पेक्टर सुशोभन श्रेष्ठले बताए ।

घरनजिकै रहेको छाउगोठमा बसेकी दुई जना बालिकामध्ये एकजना बालिकालाई छाउगोठबाट भगाएर अर्की बालिकालाई तीनजनाले सामूहिक बलात्कार गरेको इन्स्पेक्टर श्रेष्ठले बताए ।

आरोपित विरुद्ध असार २० गते जबरजस्ती करणीमा मुद्दा दायर गरी अनुसन्धान गरिरहेको जिल्ला प्रहरी कार्यालय सुर्खेतका एसपी उमाप्रसाद चर्तुवेदीले बताए । पीडित बालिकाको स्वास्थ्य परीक्षण क्षेत्रीय अस्पताल सुर्खेतमा असार १९ गते गरिएको थियो ।


दुर्गा थापा