समाचारहरू

पुस १२ गते ४ सय ८१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ५८ हजार १ सय ८१ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ३ हजार ८ सय २८ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ४९ हजार ८ सय ६३ जना निको भएका छन् । पुस १२ गते ७ सय ३१ जना निको भएका छन् भने निको हुनेको दर ९६.८ प्रतिशत रहेको मन्त्रालयले जनाएको छ । पुस १२ गतेसम्म १ हजार ८ सय २५ जना कोभिड सङ्क्रमितको मृत्यु भएको मन्त्रालयले जनाएको छ । ६ हजार ४ सय ९३ जना सक्रिय सङ्क्रमित रहेकामा ३ हजार ७७ जना होम आइसोलेशनमा छन् । उपचचाररतमध्ये २ सय ३५ जनाको उपचार आइसीयूमा र ५३ जनाको उपचार भेण्टिलेटरमा भइरहेको छ । मन्त्रालयका अनुसार मुगु र रुकुम पश्चिममा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।

बागमती प्रदेश

रसुवा प्रतिनिधि हेमनाथ खतिवडाका अनुसार नौकुण्ड र आमाछोदिङमो गाउँपालिकामा कोभिड–१९ का नयाँ सङ्क्रमित देखापरेपछि स्थानीय तहको सेवा पुस ११ गतेदेखि एक साताका लागि बन्द गरिएको छ । कोभिड–१९ सङ्क्रमित सङ्ख्या बढ्दै आएपछि गाउँपालिका भवनमा रहेका कृषि, पशु, स्वास्थ्य, शिक्षालगायतका शाखा र यहाँ रहेका स्वास्थ्य संस्थाहरू पनि बन्द गरिएको आमाछोदिङमो गाउँपालिकाका स्वास्थ्य शाखा प्रमुख निमा तामाङले बताउनु भयो । आमाछोदिङमो र नौकुण्ड गाउँपालिकामा कार्यरत स्वास्थ्यकर्मीहरूमा कोभिड–१९ सङ्क्रमण देखिएपछि स्थानीय तहमा सेवा बन्द गरिएको स्वास्थ्य कार्यालय प्रमुख किरण श्रेष्ठले बताउनु भयो । उहाँका अनुसार जिल्लाभर ३२ जना सक्रिय सङ्क्रमित छन् ।

अनलाइन डेस्क