समाचारहरू

मङ्सिर २० गते १ हजार २४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ३९ हजार ८ सय ८५ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ६ हजार ७४ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख २४ हजार ५३ जना निको भएका छन् । मङ्सिर २० गते २ हजार २ सय ६ जना निको भएका छन् भने निको हुनेको दर ९३.४ प्रतिशत रहेको मन्त्रालयले जनाएको छ । मङ्सिर २० गतेसम्म १ हजार ५ सय ७७ जना कोभिड सङ्क्रमितको मृत्यु भएको मन्त्रालयले जनाएको छ । १४ हजार २ सय ५५ जनाको उपचार भइरहेको छ । ९ हजार २ सय ६३ जना होम आइसोलेशनमा छन् भने ३ सय १२ जनाको उपचार आइसीयूमा र ४५ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र डोल्पामा सक्रिय सङ्क्रमित छैनन् भने झापा, मोरङ, काठमाडौँ, ललितपुर, भक्तपुर र कास्कीमा ५ सयभन्दा बढी सक्रिय सङ्क्रमित छन् ।

गण्डकी प्रदेश
बागलुङ प्रतिनिधि सिर्जना पन्तका अनुसार बागलुङको जैमिनी नगरपालिकाका कर्मचारीसहित समुदाय स्तरमा कोभिड–१९ सङ्क्रमण देखिएपछि मङ्सिर २० गतेबाट एक साताको लागि कुश्मिसेरा बजार बन्द गर्ने निर्णय गरिएको छ । मङ्सिर १४ र मङ्सिर १७ गते नगरपालिकासहित बैङ्कका कर्मचारीमा सङ्क्रमण देखिएपछि वित्तीय संस्थासँगै नगरपालिकाका अति आवश्यक बाहेकका सेवा बन्द गर्ने निर्णय गरिएको थियो । सङ्क्रमितको सम्पर्कमा आएका व्यक्तिको कोभिड परीक्षण गर्दा समुदाय स्तरमा समेत सङ्क्रमण देखिएपछि थप एक साताको लागि विद्यालय र बजार क्षेत्र पूर्ण रुपमा बन्द गर्ने निर्णय गरिएको जैमिनी नगरपालिकाका प्रमुख इन्द्रराज पौडेलले जानकारी दिनुभयो । उहाँले मङ्सिर २० गते राजनीतिक दल, स्थानीय अगुवा, प्रहरी, र स्वास्थ्यकर्मीहरूसँग गरिएको छलफलपछि एक साता नगरपालिका र नगर क्षेत्रका सबै गतिविधि बन्द गर्ने निर्णय गरिएको बताउनुभयो ।

अनलाइन डेस्क