कोभिड–१९ को सङ्क्रमणसम्बन्धी दैनिक अपडेट (मङ्सिर १९ गते)

मङ्सिर १९ गते १ हजार २ सय ७२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ३८ हजार ८ सय ६१ पुगेको स्वास्थ्य तथा जनसङ्ख्या मन्त्रालयले जनाएको छ । मन्त्रालयका अनुसार मङ्सिर १९ गते सङ्क्रमितमध्ये ३४ दशमलब ५ प्रतिशत महिला रहेका छन् । गत २४ घण्टामा ८ हजार ३१ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख २१ हजार ८ सय ४७ जना निको भएका छन् । मङ्सिर १९ गते १ हजार ५ सय ७५ जना निको भएका छन् भने निको हुनेको दर ९२.९ प्रतिशत रहेको मन्त्रालयले जनाएको छ । मङ्सिर १९ गतेसम्म १ हजार ५ सय ६७ जना कोभिड सङ्क्रमितको मृत्यु भएको मन्त्रालयले जनाएको छ । १५ हजार ४ सय ४७ जनाको उपचार भइरहेको छ । १० हजार ३ सय ९४ जना होम आइसोलेशनमा छन् भने ३ सय २८ जनाको उपचार आइसीयूमा र ५४ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र डोल्पामा सक्रिय सङ्क्रमित छैनन् भने झापा, मोरङ, काठमाडौँ, ललितपुर, भक्तपुर र कास्कीमा ५ सयभन्दा बढी सक्रिय सङ्क्रमित छन् ।

प्रदेश १
इलाम प्रतिनिधि कोकिला ढकालका अनुसार इलाम नगरपालिकामा कोभिड–१९ का सङ्क्रमितको सङ्ख्या बढ्दै गएपछि मङ्सिर २४ गतेसम्म अत्यावश्यक सेवा मात्र प्रवाह गरिने भएको छ । जिल्ला कोभिड–१९ सङ्कट व्यवस्थापन केन्द्रको मङ्सिर १९ गतेको बैठकले नगर क्षेत्रमा पर्ने हाटबजार, स्थानीय रूटमा चल्ने सवारी साधन विद्यालयलगायतका क्षेत्र बन्द गर्ने निर्णय गरेको हो । प्रमुख जिल्ला अधिकारी तुलसीराम सेढाईंको अध्यक्षतामा बसेको बैठकले सरकारी कार्यालय, बैङ्क तथा वित्तीय सेवामा भने आवश्यक स्वास्थ्य सुरक्षा मापदण्ड अनिवार्य रूपमा पालना गरी न्यूनतम कर्मचारीको उपस्थितिमा सञ्चालन गर्ने निर्णय गरेको छ । इलाम नगरपालिकामा मङ्सिर १९ गतेसम्म कोभिड–१९ सङ्क्रमितको सङ्ख्या १ सय १७ छ । कोभिड–१९ सङ्क्रमणका कारण इलाममा हालसम्म १२ जनाको मृत्यु भएको स्वास्थ्य कार्यालयका कोभिड फोकल पर्सन बिमल बरालले बताउनु भयो ।

सुदूरपश्चिम प्रदेश
बैतडी प्रतिनिधि नरी बडुका अनुसार समुदायस्तरमै कोभिड सङ्क्रमण फैलिन थालेपछि बैतडीका दुई स्थानीय तहमा लकडाउन गरिएको छ । सदरमुकामस्थित दशरथचन्द नगरपालिका र डिलाशैनी गाउँपालिकामा लकडाउन घोषणा गरिएका सम्बन्धित स्थानीय तहले जनाएका छन् । दशरथचन्द नगरपालिकामा मङ्सिर १२ गतेदेखि मङ्सिर २२ गतेसम्म र डिलाशैनी गाउँपालिकामा मङ्सिर १७ गतेदेखि मङ्सिर २६ गतेसम्मका लागि लकडाउन घोषणा गरिएको हो । कोभिड सङ्क्रमित दिनप्रतिदिन बढिरहेको भन्दै आवतजावत तथा भिडभाडले सङ्क्रमण फैलने भन्दै लकडाउन गरिएको दशरथचन्द नगरपालिकाकी उपप्रमुख मीना चन्दले जानकारी दिनुभयो । उहाँले भन्नुभयो–‘सङ्क्रमण फैलन नदिन लकडाउन गरेका हौँ ।’ लकडाउनको अवधिभरी दुवै स्थानीय तहका कार्यालय तथा वडा कार्यालयका अत्यावश्यक बाहेकका सेवा बन्द हुने जनाइएको छ ।


अनलाइन डेस्क